د کابل ولایت مقام کې د مرکزي زون ولایتونو د مسوولانو ترمنځ د همغږۍ ناسته شوې او په کې پر ښې همغږۍ، باور رامنځته کولو او ګډو امنیتي هڅو ټینګار شوی.
په دې ناسته کې د کابل والي او د هغه مرستيال، د استخباراتو عمومي ریاست چارواکو، د مرکزي زون ولایتونو والیانو، د علماوو شورا استازو او امنیتي چارواکو ګډون کړی و.
د لوی اختر په را رسېدو سره د کابل والي امین الله عبید وایي، په پلازمېنه کابل کې امنیتي تابیاوې نیول شوې او هېوادوال کولی شي په ډاډمنه امنيتي فضا کې د اختر خوښي ونمانځي.
عبید په دې اړه وايي: « موږ ټولو کابل مېشتو خلکو ته د پوره امنیت ډاډ ورکوو. د اسلامي امارت له راتګ سره یوه ځانګړتیا هم په ټول افغانستان کې سرتاسري امنیت دی. موږ د کابل ولسونو ته پوره اطمینان ورکوو، ځکه چې د ولایت پر سطحه او دغه راز د زون پر سطحه د اختر په را رسېدو سره د امنیت په تړاو ډېر مهم مجلسونه وشول او موږ مطمئن یو چې د کابل خلک به د امنیت تر چتر لاندې اختر ونمانځي.»
د نوموړي په خبره، امنيتي ځواکونو په کابل کې چک پواینټونه او ګرځنده ګزمې زیاتې کړې دي، ترڅو خلک د اختر شپې او ورځې په خوشحالۍ سره تېرې کړي.
د کابل والي زیاتوي: « موږ د پوره امنیت ډاډ ورکوو، هېڅ ستونزه به نه رامنځته کېږي، ځکه چې د اسلامي امارت ځانګړي ځواکونه که امنیتي دي، که کشفي او که دفاعي ټول خپلو مسوولیتونو ته متوجه دي او ولسونو ته یې د ښه اختر زمینه برابره کړې.»
په ورته مهال، د پلازمېنې اوسېدونکي هم له امنیتي بنسټونو غوښتنه کوي چې د اختر پرمهال د امنیت لا تامین لپاره زياتې هڅې وکړي.
د کابل اوسېدونکی سېد حسین وايي:« کله چې دولت د امنیت په ټینګولو کې بریالی شي، خلک هم له دولت سره د تعلق حس پیدا کوي. له همدې امله د ټولو خلکو غوښتنه دا ده چې امنیت ټینګ شي، ترڅو ټول د اختر مېله ونمانځي او ښه اختر ولري.»
د اسلامي امارت له بیا واکمنېدو او په هېواد کې د سراسري امنیت ټینګېدو سره سم، ګڼ کورني سیلانیان د اختر او نورو عمومي رخصتیو پر مهال د هېواد له طبیعي ښکلاوو او تاریخي سیمو لیدنه کوي.
