سره له دې، چې د دې ناستې جزئیات رسنیز شوي نه دي، خو باور کېږي چې پر دوه اړخېزو اړیکو او هغو ستونزو پرسر بحث او مذاکرات شوي، چې اسلامي امارت او امریکایان ورسره مخ دي.
د کارپوهانو په وینا، د امریکا او طالبانو د هوکړې داسې موارد شته، چې عملي کول یې اوسنیو شرایطو کې کېدای شي او امریکا هم غواړي، طالبانو سره د اړیکو ساتلو سلسه جاري اوسي.
د سیاسي چارو کارپوه قریب الرحمن شهاب وايي:« د طالبانو او امریکا ترمنځ د بحث زیات مسایل شته دی، چې تر تولو مهم یې د دوحې تړون طبیق دی، ځکه ظاهرا طالبان په تصادفي ډول کابل ته راغلل، هغه تړون داسې وه، چې ځینې مادې یې وخت ته اړتیا لري ترڅو طبیق شي او دواړه لوري یو پر بل باور وکړي. تر دې وراخوا طالبان اړتیا لري، چې د خپل حکومت د اقتصادي ثبات، سیاسي ثبات او نړۍ ته قناعت ورکړي، چې دوی ته به له افغانستان ګواښ نه وي.»
کارپوهان وایي، د طالبانو او امریکا ترمنځ شل کاله جګړې او کابل کې د تېر حکومت له سقوط وروسته داسې باور نه دی راغلی، چې یو بل سره رسمي سیاسي اړیکې او تعاملات پیل کړي.
د سیاسي چارو کارپوه عبدالحی قانت وايي:« د تېر حکومت له سقوط وروسته، چې طالبان واک ته ورسېدل د امریکا او طالبانو ترمنځ هغه باور لاهم نه شته، چې یو له بل سره سیاسي تعاملات پیل کړي. زه فکر کوم، امریکا اوس ذهنا دې ته چمتو ده، چې له نوي حکومت سره تعاملات له لږ ځنډ وروسته پیل کړي.»
امریکایان هڅه کوي، چې له اسلامي امارت سره په امنیتي او استخباراتي برخه کې یوه هوکړه وکړي.
امریکا له داعش او القاعده ډلو وېره لري او غواړي، د یوې ګډې مبارزې لپاره له اسلامي امارت سره تړون ولري، خو اسلامي امارت ټولو ته ډاډ ورکړی، چې له افغانستانه به ورته ګواښ نه پېښېږي او په یوازې ځان کولی شي، له داعش ډلې سره بریالۍ مبارزه وکړي.
