د ملګرو ملتونو امنیت شورا د افغانستان بشري وضعیت اروزولو په اړه په روانه مياشت کې ناسته کوي.
يادې شورا ويلي، په دې ناسته کې به د افغانستان لپاره د ملګرو ملتونو د سياسي استازولۍ(یوناما) مشره روزا اونتبايوا د ملګرو ملتونو د ښځو برخې مشره سیما باهوس او د اوچا ځيني چارواکي د افغانستان سیاسي او اقتصادي وضعیت په اړه مالومات وړاندې کړي.
د مالوماتو پر بنسټ، دې ناستې ته د وړاندې کېدونکي راپور مهمه برخه به افغانستان ته د بشري مرستو رسولو په اړه وي.
یادې شورا زیاته کړې:« په جون کې به د ملګرو ملتونو امنیت شورا د افغانستان په اړه خپله درې میاشتنۍ عمومي ناسته وکړي او ورپسې به تړلې مشورتې خبرې پیل کړي. په دې ناسته کې د ملګرو ملتونو د سر منشي ځانګړې استازې او د افغانستان لپاره د دې سازمان سیاسي استازولۍ مشره روزا اتونبایوا، په ملګرو ملتونو کې د ښځو اجرائیوي ریيسه سیما باهوس او د بشري مرستو د همغږۍ ادارې یو چارواکی هم ګډون ولري، چې افغانستان ته د بشري مرستو رسولو د ۲۶۱۵ پرېکړه لېک په اړه بحث به د ناستې مهمه موضوع وي.»
په راپور کې د اپرل له ۲۷ د مې تر ۲ پورې د بشري چارو لپاره د ملګرو ملتونو مرستیال ټام فلیچر افغانستان ته د سفر او له روغتیايي سکټور سره د نړیوالې مرستو د کمېدو اغېزو په اړه مالومات ورکړل شوي او ادعا شوې، چې د مرستو کمېدو له امله شاوخوا ۴۰۰ روغتیايي مرکزونه تړل شوي دي.
خو له دې راپور وړاندې د عامي روغتیا وزارت چارواکو د سلګونو روغتیايي مرکزونو د تړلو راپورونه رد کړي او زیاته یې کړې ده چې دغه مرکزونه لاهم د نړیوالو همکارو سازمانونو له لوري تمویل کېږي.
د عامې روغتیا وزارت مالي او اداري معین بخت الرحمن شرافت وايي:« زموږ هېڅ صحي مرکز یا روغتون تړل شوی نه دی. کوم روغتونونه چې نړیوالو خیریه بنسټونو مخکې هغه تمویل کول، کله چې په ولسوالۍ او ولایت کې هغوی ترې لاس اخیستی، هغه د افغانستان اسلامي امارت د عامې روغتیا وزارت خپله تمویل کړی.»
د سیاسي چارو کارپوهان وايي، د ملګرو ملتونو د دې ناستو موخه په افغانستان کې د بشري حقونو د رعایتولو مسایل دي چې لاهم د سرپرست حکومت او نړیوالې ټولنې تر منځ د تعامل پر وړاندې خنډ دي.
د دوی په خبره، سرپرست حکومت دې له نړیوالې ټولنې سره د رسمي تعامل لپاره خپلې پالیسۍ نرمې کړي.
د سیاسي چارو کارپوه شهسوار سنګروال وايي:« زه فکر کوم دغه ناسته به مهمه ځکه وي چې افغانستان اوس دومره حساس وخت ته رسېدلی دی چې له یوې خوا یې سیمې او نړۍ سره اړیکې رغوونکي دي او له بلې خوا په ملګرو ملتونو کې غړیتوب نه لري. نو ځکه ماته دغه ناسته مهمه ښکاري، خو اسلامي امارت ته هم دغه په کار ده، په دې کې شک نشته دی چې په افغانستان کې یو باثباته مرکزي حکومت شتون لري. په دې کې شک نشته دی چې په افغانستان کې سراسري سوله ده.»
د سیاسي چارو کارپوه عزیز معارج وايي:« په ډېرې خواشینۍ سره باید ووایم چې د امنیت شورا او د ملګرو ملتونو ناستې چې اسلامي امارت حاکم شوی دی، په څه کم څلورو کلونو کې څو ځلې وشوې، افغانستان په انزوا کې دی او نړیوالې مرستې هم دلته نه کېږي، ملت هم یو څه کړیږي، دا ناستې جوړې شوې خو هېڅ ګټه یې ونه کړه، کوم عملي ګام یې پورته نه کړ. نه یې اسلامي امارت نړیوالو ته داسې معرفي کړ چې پر رسمیت یې وپېژني، نه یې بشري مرستې جاري وساتلې، نه یې د افغانستان اړیکو ته داسې لاره برابره کړه، یوازې کیني او بېرته ولاړ شي او بیا پخوانۍ خبرې تکرار کړي. دې خوا طالبانو هم ونه شوی کړی چې دوی ته یو څه قناعت ورکړي. »
راپور کاږي چې اوس مهال د نږدې ۶۸ ملاتړو بنسټونو له لوري د مرستو له کمېدو سره ۴۵ سلنه د افغانستان جغرافیوي پوښښ هم راکم شوی او په دې توګه دغه هېواد کې د ملګرو ملتونو څه باندې ۴۰ سلنه کارکوونکي له دندو ګوښه شوي.
په راپور کې له نړیوالو سازمانونو سره د بودیجې کمښت ته په اشارې له نړیوالې ټولنې غوښتل شوي چې له اړمنو افغانانو سره خپلو مرستې ډېرې کړي.
