د امریکا ولسمشر ډونالډ ټرمپ او د ياد هېواد کورني امنیت وزارت هغه پرېکړه د امریکايي سیاستوالو ترمنځ پر اختلافي موضوع بدله شوې چې له مخې یې د لنډمهاله خونديتوب(ټي.پي.اېس) په موخه امريکا ته ورغلي شاوخوا ۸ زره افغانان بېرته افغانستان ته استول کېږي.
د امریکا سنا جرګې دوو غړیو جینې شاهین او لیزا مورکاسکي تازه د یوه لیک له لارې د ولسمشر ټرمپ ادارې دغه پرېکړه غندلې او ترې غوښتي يې دي چې په دې موضوع له سره غور وکړي.
د لیک په یوه برخه کې راغلي: « موږ په دې لیک کې پر هغې وروستۍ پرېکړې ژوره خواشیني څرګندوو چې له مخې یې د لنډمهاله خوندیتوب طرحې د څه باندې هغو ۸ زرو افغان کډوالو د مېشتېدنې پروسه پای ته رسوي چې دا مهال په امریکا کې مېشت دي.»
په لیک کې خبرداری ورکړل شوی چې دغه پرېکړه کولی شي د ښځو او ماشومانو په ګډون د زرګونه افغان کډوالو ژوند له ګواښ سره مخ کړي.
د دې ترڅنګ، دغه پرېکړه ستر تاریخي خیانت بلل شوی او د هغو ارزښتو او ژمنو له منځه تلل یې بللي چې له مخې یې امریکا په تېرو ۲۰ کلونو کې په افغانستان د لاسته راوړلو هڅه کوله.
په دې لیک کې زیاته شوې: « دغه پرېکړه د زرګونه هغو افغان کډوالو ژوند له ګواښ سره مخ کوي چې (په تېرو ۲۰ کلونو کې) یې له امریکا سره همکاري کړې. دغه پرېکړه زموږ کړو ژمنو ته تاریخي خیانت بلل کېږي او هغه ارزښتونه له منځه وړي چې موږ یې د تحقق لپاره په افغانستان کې ۲۰ کاله جګړه وکړه.»
د افغان کډوالو د حقونو چارو فعالان هم دغه پرېکړه غندي او وايي، دا پرېکړه کولی شي د لنډمهاله خوندیتوب طرحې په اډانه کې شامل ۸ زره افغان کډوال له نا څرګند برخلیک سره مخ کړي.
د کډوالو د حقونو مدافع علیرضا کریمي وايي: « د امریکا د حکومت دا پرېکړه د مهاجرتي سیاستونو د سختولو ښکاروندويي کوي او د زرګونه افغان مهاجرو ژوند له خطر سره مخامخوي. له انساني لید لوري، د هغو انسانانو شړل چې له جګړې او نا امنیو تښتېدلي وي، نه یوازې د امریکا اخلاقي ژمنې له پوښتنې سره مخ کوي بلکې کولی شي افغانستان کې د لا پراخو ناورینونو سبب هم شي. همدارنګه دغه اقدام کولی شي له پناه غوښونکو او کډوالو د ملاتړ په اړه د امریکا اعتبار هم کمزوری کړي او دغه راز په افغانستان کې د اقتصادي او ټولنیزو اندېښنو یوه لویه څپه رامنځته کړي.»
د کډوالو د حقونو مدافع عبدالرازق عدیل وايي: « د امریکا دغه پرېکړه کولی شي د ۱۴ زره ۶۰۰ افغانانو ژوند له ګواښ سره مخ کړي چې د ایستلو له خطر سره مخ دي. د دې نا عادلانه او اندېښمنوونکي ملاتړ پای ته رسولو سره باید امریکا خپل هغه اخلاقي تعهد وساتي چې په افغانستان کې د همکارۍ پرمهال یې له دغو کسانو سره کړی و.»
د امریکا د لنډمهاله خوندیتوب طرحه د هغو هېوادونو د وګړو لپاره په امریکا کې د لنډمهاله مېشتېدنې فرصت برابروي چې د پراخو جګړو، طبیعي آفتونو او بشري حقونو د نقض په څېر له ژوند ګواښوونکو خطرونو سره مخ وي.
