د افغانستان لپاره د پاکستان ځانګړی استازی محمد صادق خان وايي، د افغانستان لپاره يي د ازبېکستان له ځانګړي استازي عصمتالله ارګاشېف سره خبري کړې او دا خبرې يې ګټورې وې.
د نوموړي په خبره، له ارګاشېف سره يې په دې بحث کړی چې څنګه پاکستان او ازبېکستان له افغانستان سره د سياسي اړيکو زياتولو ترڅنګ سوداګري پياوړې او پر اقتصادي همکاريو سربېره د ظرفيت لوړولو په برخه کې همکاري کولی شي؟
محمد صادق خان پر خپله اېکس پاڼه لیکلي: « د افغانستان لپاره د ازبېکستان له ځانګړي استازي عصمتالله ارګاشېف سره مې ګټوره انلاین ناسته وکړه. له افغانستان سره مو د خپلو هېوادونو د اړیکو په تړاو ژور بحث درلود چې د سوداګریزو او اقتصادي همکاریو او پر ظرفیت لوړونې سربېره په کې ګڼ مهم مسايل شامل وو. په دې ناسته کې مو دغه راز د افغانستان او ازبېکستان ترمنځ د اورګاډي پر هغې پروژې هم خبرې وکړې چې حیرتان له کراچۍ سره نښلوي.»
په ورته مهال، د اقتصادي چارو شنونکي له یادو هېوادونو سره د سوداګرۍ پياوړتیا لپاره اړیکې مهمې بولي، خو د پاکستان پر ژمنو باور نه لري.
دوی وايي، پاکستان د سیاسي اړیکو ترڅنګ په سوداګرۍ کې د ستونزو حل په موخه په وار وار ژمنې کړي، خو عمل پري نه کوي.
د اقتصادې چارو شنونکی نورالله عزیز وايي: « هرڅومره چې اړیکې پراختیا پیدا کوي او د هېوادونو ترمنځ په سیاسي، تجارتي او اقتصادي برخه کې ناستې ترسره کېږي، د افغانستان او د سیمې د نورو هېوادونو لپاره اړین دي. له دې لارې افغانستان ته په کافي اندازه پانګه داخېلېدای شي او د پانګې اچونې په صورت کې د وزګارتیا کچه کمېږي او کاري فرصتونه ډېرېږي.»
بله خوا د سیاسي چارو شنونکي بیا وايي، سرپرست حکومت دې د رېل پټلۍ پروژې ترڅنګ په لویو پروژو کارونه چټک کړي او په ګاونډیو دې خپله اتکا راکمه کړي.
دوی زیاتوي، ځینې ګاونډي هېوادونه نه غواړي چې افغانستان ځان بساینې ته ورسېږي.
د سیاسي چارو شنونکی شهسوار سنګروال وايي: « بد بختانه پاکستان ډېر کله دغه شان ناستو ته سیاسي رنګ ورکوي، که په دې ناستو کې په اقتصادي مسایلو هم بحث شوی وي، دوی یې سیاست ته راکاږي. دا چې اوس وخت په دې اړه څه شوي یا نه دي شوي یا خبرې شوې، که چېرې عمل پرې وشی، نو دا پروژې چې د یوه پلان له مخې رامنځته شوې او دا عملي شي، ګټه به ولري.»
له دې وړاندې هم پاکستاني او ازبېکستاني چارواکو له افغانستان سره د سیاسي اړیکو زياتولو ترڅنګ، له افغانستانه د امنيتي مسايلو په اړه خبرې کړې وې.
تازه څرګندونې يې په داسې حال کې دي چې پاکستان له افغانستان سره د سفير ترکچې د اړيکو زياتولو پرېکړې کړې.
