عبدالرحمان له کلونو راهیسې په کرنې بوخت دی او خپلې کروندې لري. نوموړوی په خپلو ځمکو کې د غنمو ترڅنګ کورښې(لوبیا)، نخود او نور حبوبات کري.
پیاز، کچالو او روميان یې د کروندې بله برخه جوړوي چې سږ کال یې کرلي دي.
عبدالرحمان غوښتنه کوي چې د کرنې په مکانیزه کولو، اصلاحي تخمونو او نور کرنیزو برخو کې ورسره مرسته وشي.
کروندګر عبدالرحمان وايي: « موږ دلته خپله کرونده کې نخود، لوبیا، جوار، مشنګ، غنم، لمرګلی، مۍ او ځینې نور شیان کرلي دي. همدارنګه د ترکاري په حساب مو پیاز او کچالو کرلي.»
یوبل کروندګر رجب علي وايي: « دلته غنم، کچالو، وربشې، جوار، لوبیا، نخود، لمرګلی او پیاز مې کرلي دي.»
بله خوا د کرنې اوبو لګولو او مالدارۍ وزارت له لوري د کروندې ورځې نمانځلو په موخه غونډه جوړه شوې.
په دې غونډه کې چاراوکي له بزګرانو سره د هر ډول تخنیکي او مسلکي مرستو ډاډ ورکوي.
د کرنې وزارت د کرنیزو څېړنو رییس نصرت الله طلحه وايي: « ټول دهقانانو او ځمک لرونکو ته ډاډ ورکوو که د چا ضرورت وي له موږ سره ې رابطه وکړي، موږ په اکثره فارمونو کې د خاورې څېړنې لابراتوارونه لرو او کولی شو په ډېره اسانۍ سره دوی ته ټول مالومات ورکړو. همدارنګه موږ نقشې او کتابونه لرو او که څوک یې مطالعه کړي، د اکثریت ولسوالیو مالومات په کې پراته دي.»
د دې وزارت ځينې نور چارواکي وايي، جدي هڅې یې پیل کړې دي چې افغانستان د کرنې او مالدارۍ په برخه کې ځان بسیاینې ته ورسوي او په خبره يې په یادو برخو کې ځان بسیاینې ته د رسیدو لپاره مهمه ده چې کرنه مکانيزه شي.
د کرنې وزارت د کرنې او مالدارۍ معین صدراعظم عثماني وايي: « هڅه دا ده چې په هره برخه کې که دا څېړنې دي، که ترویج دی او که مالداري؛ له دې سربېره نورو برخو کې هم کار روان دی چې دومره کوشش وشي چې موږ خودکفايي ته ورسېږو.»
افغانستان زراعتي هېواد دی چې اکثریت وګړي یې پر کرنې او مالدارۍ بوخت دي.
د اقتصادي چارو شنونکي په دې باور دي که کرنې او مالدارۍ ته جدي پاملرنه وشي نو د افغانانو اقتصاد به هم پر پښو ودرېږي.
