په داسې حال کې چې د سیمې یو شمېر هېوادونه او په ځانګړې توګه پاکستان په متواتره توګه له افغانستانه اندېښنې مطرح کوي او داسې ښيي چې ګواکي له دې ځايه نا امني خپرېږي.
د رياست الوزرا اداري مرستيال که څه هم په ښکاره د کوم هېواد نوم نه يادوي، خو وايي ځيني هېوادونه په ښکاره د افغانستان کمزوري کولو هڅه کوي او په دې توګه د خپلو سيمه ييزو اهدافو د تعقيب په لټه کې دي.
مولوي عبدالسلام حنفي دا څرګندونې په کابل کې د ملي نندارتون پرانستغونډې پرمهال کړې او زياته کړې يې ده چې په افغانستان ثبات د سيمې ثبات تضمينولی شي او له همدې کبله دې ياد هېوادونه د افغانستان په کورنيو چارو کې لاسوهنه نه کوي.
حنفي په دې اړه وايي: « د سیمې او نړۍ له هېوادونو سره نېکې اړیکې غواړو. دا اړیکې باید د متقابل احترام پر بنسټ وي، موږ نه غواړو د هغوی په کورنیو چارو کې مداخله وکړو او له دوی هم غواړو چې زموږ په کورنیو چارو کې د لاسوهنه نه کوي.»
حنفي د سرپرست حکومت هغه دريځ هم روښانه کړ چې وړاندې يې په سيمه کې د ثبات له ټينګښت سره د همکارۍ په اړه بيان کړی و.
حنفي زياتوي، د ثبات په اړه د سرپرست حکومت پالیسو په پایله کې له افغانستانه د سيمې هېوادونو اندېښنې هم په کمېدو دي.
مولوي عبدالسلام حنفي په دې اړه وايي: « له یوه لاس ټک نه خېژي، په هغه صورت کې چې یو طرف مداخله وکړي، دا طبیعي خبره ده چې مقابل طرف هم خپل وس ته په کتو مداخله کوي. دا د ګاونډیو هېوادونو پر ګټه نه ده، بلکې د دوی ګټه په دې کې ده چې د متقابل درناوي له مخې، یوبل سره ښې اړیکې ولرو. موږ باید ښې اقتصادي اړیکې ولرو او خپلې ګټې د نورو په خرابۍ کې ونه وینو.»
د صنعت او سوداګرۍ وزارت سرپرست نورالدین عزیزي وايي: « که خدای مه کړه افغانستان کې یو مصیبت راځي، همدا مصیبت په بهرنیو هېوادونو کې هم راځي.»
د نړیوالو اړیکو کارپوهان په دې اند دي چې په ګاونډ کې ځیني هېوادونه په افغانستان کې د پياوړي مرکزي حکومت له جوړېدو وېره لري او په خبره یې، دغو هېوادونو تل هڅه کړې چې پر نړیوالو سټیجونو افغانستان کمزوری وښيي.
دوی له سرپرست حکومته غواړي چې د استحکام او لا پياوړتيا لپاره دې د خلکو مشروع غوښتني ومنې.
نړیوالو اړیکو شنونکی نجیب الرحمن شمال وايي: « لکه څرنګه چې پوهېږئ د نړۍ یو شمېر هېوادونه په افغانستان کې د خپلو ګټو ترلاسه کولو لپاره هڅه کوي چې د افغانستان له سرپرست حکومت سره ښې اړیکې او تعامل ولري.»
سره له دې چې واک ته د اسلامي امارت له بیا رسېدو نږدې څلور کال تېرېږي؛ خو سرپرست حکومت یې لا هم کوم هېواد پر رسمیت نه دی پېژندلی.
