د امریکا او قطر د بهرنیو چارو وزیرانو یوه هوکړه کړې، چې له مخې به یې په کابل کې د قطر په سفارت کې د امریکا یوه مشورتي څانګه پرانېستل شي او قطر به د واشنګټن د ډيپلوماټیکو اړیکو د خونديتوب مسوول وي.
د امریکا بهرنیو چارو وزیر انتوني بلېنکن وايي:« نن موږ دوه نوې هوکړې لاسلیک کوو، چې په افغانستان کې زموږ د ګډو همکاریو په تړاو ده. لومړی هوکړه لیک دا دی، چې قطر به په افغانستان کې د امریکايي ګټو د خوندي کوونکي په توګه کار کوي او هغوی به په خپل سفارت کې د امریکا لپاره یو مشورتي دفتر پرانیزي. دغه راز په افغانستان کې به یې د امریکايي ډیپلوماټانو امنیت هم پر غاړه وي.»
د هوکړې اعلان مراسمو کې د قطر د بهرنیو چارو وزیر شیخ محمد بن عبدالرحمن الثاني ژمنه وکړه، چې د افغانانو د ژوند خوندیتوب او د افغانستان ثبات لپاره به د تېر په څېر خپلو هلو ځلو ته دوام ورکړي.
الثاني زیاتوي:« په افغانستان کې اوس هم زموږ ډېر ګډ کار ته اړتیا ده او قطر دې ته ژمن دی، چې له امریکا سره په دې برخه کې ګډ کار وکړي. موږ دې ته ژمن یو، چې په افغانستان کې د ثبات لپاره او د افغانانو ژوند او خوندیتوب لپاره د خپلې برخې مسوولیت ترسره کړو. ننني سټراټيژیک مذاکرات به زموږ ګډ مسوولیت نور هم روښانه کړي.»
اخوا د سیاسي چارو شنوونکي بیا وايي، هر ډول خبرې اترې او مذاکرات، چې په سیاسي ډول یې افغانستان ته ګټه رسېږي باید دوام وکړي او اسلامي امارات هم په کې دخیل پاتې شي.
شنونکی شیرحسن حسن وايي:« له امریکایانو سره خبرې ډېرې ګټورې دي. زموږ هېله دا ده، چې طالبان تر رسمیت پېژندنې پورې له نړیوالې ټولنې او امریکا سره مذاکرات وکړي او هغه معظلات، چې د دواړو لورو ترمنځ دي، هغه له منځه ولاړ شي.»
خو ځنې نور بیا په دې باور دي، چې په افغانستان کې د امریکا ډيپلوماټيکې څانګې پرانېستل ګته نه کوي، ترڅو طالبان د امریکا له لوري په ترویکا او نورو غونډو کې کړې غوښتنې ونه مني او عملي یې نه کړي.
شنونکی طارق فرهادي وايي:«دا چې قطر په افغانستان کې د امریکا د ګټو محافظ دی، دا یوه معمول خبره ده. سویس هم په ایران کې ورته دنده ترسره کوي، خو اړینه دا ده، چې پایلې به یې څه وي. پایله دا ده، چې تر هغې امریکا افغانستان پر رسمیت نه پېژني او نه هم ورسره نړیوالې مرستې کېږي، ترڅو چې په ترویکا کې شوې ژمنې د طالبانو له لوري عملي نه شي.»
