د جينوا خبرو اترو او پرمختګ مرکز په نوښت د ملي ډيالوګ تر نامه لاندې ناسته د ترکيې په انتاليا کې جوړه شوه.
تنظيموونکي يې وايي، دغه ناسته په افغانستان کې سټراټيژيکو ننګونو، بشري او ټولنيزو حقونو ته د رسېدنې په موخه رابلل شوې چې په کې د مدني ټولنو او ښځو استازو، د بشري حقونو مدافعانو، خبريالانو او ځينو سياسي څېرو ګډون کړی.
د دې ترڅنګ، په راتلونکي کې د افغانستان سياسي ساختار په اړه بحث هم د يادې ناستې د اجنډا مهمه موضوع ياده شوې چې د حکومت سياسي مخالفانو له لوري پرې هم څو ځله بحثونه شوي.
خو د چارو شنونکي د هغو ناستو پايله هېڅ بولي چې د بحث محور يې افغانستان وي، خو د سرپرست حکومت استازی په کې نه وي.
د سياسي چارو شنونکی زلمی افغانيار وايي: « دغه ناسته هم د تېر په څېر یوازې اعلامیه صادروي او غندنه کوي؛ ځکه چې د افغانستان د سرپرست حکومت استازی هلته نه شته. زه هیله لرم په بحث کې مطرح شويو تقابلاتو ته د خبرو اترو له لارې حل پیدا کړي. د حکومتوالۍ او حکومت جوړونې بحث د افغانستان په ملت پورې اړه لري. په تېرو څو لسیزو کې د افغانستان لپاره حکومتونه د بهرنیو نسخو او هغو کسانو په غوښتنه جوړ شول چې له دوی سره یې تړاو درلود. آیا د افغانستان ملت نه شي کولی خپل برخلیک وټاکي او دغه ناستې په سیاسي موج سورېدنو باندې مدیریت شي. ښکاره خبره ده چې دغه ناستې افغانستان ته ګټه نه لري.»
د شنونکو په اند، په دې ناسته کې پر مهمو مسايلو بحث کوونکي هغه کسان دي چې پخوا د حکومتولۍ په برخه کې ناکام شوي. د دوی په خبره، ښه به دا وي چې د ناستې رابلونکي د غونډو جوړولو په ځای خپل وړانديزونه له سرپرست حکومت سره شريک کړي او پر معقولو حللارو ورسره وغږېږي.
د سياسي چارو شنونکی اسماعیل ځدراڼ وايي: « دا هغه کسان او چارواکي دي چې ولس هم پېژندلي؛ یوازې اسلامي امارت نه بلکې د افغانستان ټول ولس هم په دې باور نه لري؛ ځکه چې دوی دلته د دولت واګي په لاس کې لرل، څه یې وکړل؟ دوی یوازې د ولس په وینو کاروبار وکړ او د دولت بیت المال یې چور کړ. زه فکر کوم دا ډول ناستې کومه نتیجه نه ورکوي.»
د جينوا خبرو اترو او پرمختګ مرکز له دې وړاندې هم د سرپرست حکومت د استازي له ګډون پرته درې ځله د افغانستان په اړه په تورکيه کې ناستې کړې دي. که څه هم دې مرکز ويلي چې يادو ناستو ته يې د حکومت استازي وربللي، خو حکومت يې د بلنې ردولو ترڅنګ بحثونه هم بې پايلې ياد کړي.
