کابل ښار کې ځانګړي عملیات؛ یو ماشوم د انسان تښتونکو له منګولو ازاد شو

د اسلامي امارت د استخباراتو لوی ریاست منسوبینو د مرکز کابل اړوند کارته نو سیمه کې د یو لړ ځانګړو عملیاتو په ترڅ کې دغه ماشوم ژغورلی او په تړاو یې دوه تنه انسان تښتونکي وژلي او درې نور یې ژوندي نیولي دي.

ماشوم باطن شاه نومېږي، چې اوسمهال بېرته له خپلې کورنۍ سره یو ځای شوی دی.

انسان تښتونکو پر خپل جرم اعتراف کوي، چې ماشوم یې د تایمنیو له پنځم سړکه تښتولی وو.

د اسلامي امارت مسوولین وایي، په دغه قضیه کې ځینې ښځې هم لاس لري، چې له انسان تښتونکو سره یې لاس یو کړی دی او ډاډ ورکوي، چې د اسلامي امارت مجاهدین به د سر په بیه له خپل ولس ساتنه وکړي.