د افغانستان بهرنیو چارو چارسمبالي وزیر امیر خان متقي پر مشرۍ پاکستان ته د تللي پلاوي سفر چې دوه وزیران او رئیسان یې ملتیا کوي،د صنعت او سوداګرۍ خونه او سوداګر هېله من کړي دي.
د افغانستان صنعت او سوداګرۍ خونې مرستیال خان جان الکوزی وايي، تمه لري،چې له دې سفر وروسته به د دواړو هېوادونو ترمنځ د سوداګرۍ او ترانزیټ برخه کې شل کلنې ستونزې حل شي.
الکوزی وايي،له دې وروسته به د افغانستان صادرات د واګې بندر له لاري هند ته هم لېږدول کیږي.
الکوزی زیاتوي:« دې سفر کې چې د اسلامي امارت درې وزیران شامل وو، د نورو سفرونو سره یې توپیر درلود. کومې ستونزې چې په تېرو شلو کلونو کې وې، هغه به ټولې حل کیږي او د افغانستان صادرات به له واګې بندر له لاري کېږي.»
الکوزی زیاتوي،چې د ستونزې حل لپاره پاکستاني لوري ته یوه میاشت وخت ورکول شوی، چي ستونزې حل کړي او په وینا یې د دې ستونزو د حل لپاره یو کمېسیون هم جوړ شو.
افغان سوداګر بیا وايي، له پاکستاني لوري دې د افغان سوداګرو د ستونزو د حل لپاره په لیکلې بڼه ژمن لیک واخېستل شي،ترڅو افغان سوداګر له ستونزو خلاص شي.
