د شانګهای همکاريو سازمان ۲۰ مه ناسته د هند په نوي ډيلي کې ترسره شوه چې په کې د بحث تمرکز پر سټراټيژيکو خبرو اترو، د اقتصادي او کلتوري همکاريو پر زياتوالي او د ياد سازمان پر اغېزمنتيا ورټول و.
ازبېکستاني رسنيو راپور ورکړی چې د دې هېواد د سټراټيژيکو مطالعاتو موسسې مرستيال په دې ناسته کې د امنيت او سياسي ثبات د تحکيم لپاره له افغانستان سره د همکاريو دوام، په سيمه کې د امنيت او ثبات عامل بللی او زياته کړې يې ده چې باثباته افغانستان زيات اقتصادي فرصتونه رامنځته کولی شي.
بختيار مصطفی اېف له افغانستان سره د شانګهای سازمان د تماس ډلې فعالېدو غوښتنه هم کړې.
د ازبېکستان د سټراټيژيکو مطالعاتو موسسې مرستيال بختيار مصطفی اېف ویلي: « باثباته افغانستان نه يوازې د بشري بحران مهارولو لپاره مهم دی بلکې د پام وړاقتصادي فرصتونه، لکه ټرانسپورټي دهلېزونه، د يوه سيمه ييز اقتصادي موډل رامنځته کول او د اقتصادي او سوداګريزو همکاريو پراختيا هم برابروي. د ننګونو له منځه وړلو لپاره بايد د شانګهای سازمان د تماس ډله فعاله شي. د افغانستان روان وضعيت د بحران په توګه دوامداره دی او ورته د رسېدنې لپاره د دې سازمان غړیو هېوادونو له لوري يوه همغږي اقدام ته اړتيا شته.»
په ورته مهال، سرپرست حکومت د افغانستان په اړه د ازبېکستان د دريځ ستاينه کوي او وايي، په افغانستان کې امنيتي، اقتصادي او سياسي ثبات د ټولې سيمې پر ګټه دی او ټينګار کوي چې په راتلونکو ورته ناستو کې دې يې استازي هم ور بولي.
د اسلامي امارت ویاند ذبيحالله مجاهد وايي: « دا چې د شانګهای همکاریو سازمان یو غړي یا د ازبېکستان هېواد استازي له افغانستان سره د اړیکو په اړه چې کومه غوښتنه کړې، موږ د دې قدردانی کوونکو. ټول هېوادونه باید د افغانستان اهمیت درک کړي او له سیمه ییزو پرمختګونو سره د افغانستان الحاق د ټولو پر ګټه دی. همدارنګه د افغانستان ثبات او امنیت د سیمې د ودې او اقتصادي رفاه لپاره هم پرګټه دی، نو دا یو ښه اقدام دی او موږ هم غواړو چې دغه ګام باید پورته شي.»
د سیاسي چارو شنونکي بيا دا ډول ناستې د سوداګرۍ پياوړتيا ترڅنګ د سيمې له هېوادونو سره د سرپرست حکومت د اړيکو پراختيا لپاره هم مهمې بولي.
د نړيوالو اړيکو شنونکی عزیز معارج وايي: « د مثال په توګه، که د شانګهای سازمان غړي هېوادونه وکولی شي له افغانستان سره همکاري وکړي، د افغانستان زیاتې اقتصادي او سیاسي ستونزې به حل شي. د دې لپاره باید د اسلامي امارت چارواکي یو پروګرام ایجاد کړي، ترڅو د تجارتي، اقتصادي او بالاخره سیاسي او ډېپلوماټیکو اړیکو جوړېدو او پراختیا لپاره زمینه برابره شي.»
د اقتصادي چارو شنونکی نورالله عزیز وايي: « په دې سازمانونو کې ګډون او د دې سازمانونو په مرسته له هېوادونو سره د تجارتي اړیکو پیاوړتیا، هغه څه دي چې د افغانستان پر تجارت مثبت تأثیر لرلی شي.»
په هند کې د شانګهای همکاريو سازمان ناسته د ۳۰ کارپوهانو او د غړيو هېوادونو د استازو په حضور کې د روانې مې میاشتې پر ۲۱ او ۲۲ نېټو ترسره شوه.
