د امریکا ولسمشر او امنیتي چارواکو د دې هېواد خوندیتوب ته د مدافعې پرمختللو سیستمونو ایجاد ، دامنیتي ځواکونو او چارواکو په دندو کې د بدلون او له افغانستانه د امریکايې ځواکونو د وتلو په تړاو د محاسبې ځانګړې ناسته کړې.
د امریکا دفاع وزیر پيټ هېګزېټ له افغانستانه د امریکايي ځواکونو د وتلو بهیر کې ښکېل امنیتي چارواکي او د رهبرۍ غړي ګرم بللي چې له بهر کېدو نږدې څلور کاله وروسته یې لاهم د دغه بهیر محاسبه نه ده کړې.
هغه زیاته کړې:« د افغانستان د وتلو ناورین په اړه هېڅ حساب کتاب نه دی شوی ، رهبري مسوولیت منلو ته چمتو نه ده او اوس مهال د دې وخت را رسېدلی چې د دې مسوولیت د رهبرۍ ټولو چارواکو ته ور وګرځول شي.»
له دې سره د امریکا دفاع وزارت لوړپوړی سلاکار او ویاند د امریکايي ځواکونو بهر کېدو پر پروسې د بیاکتنې ټینګار کړی.
شان پارنېل د یادې محاسبې د ترسراوي لپاره د رهبرۍ چارو مسوولیت هرکلی کړی او یاد اقدام يې د امریکایانو د حقونو لپاره مهم بللی.
پارنېل زیاته کړې:« په افغانستان کې مې ۴۸۵ ورځې خدمت کړی. زموږ ډلګۍ ۸۵ سلنه مرګ ژوبله لرله چې دا زما لپاره یوه شخصي موضوع ده . امریکا! حقیقت را روان دی او زه دې ته سترګې پر لاره یم چې د حساب کتاب ورکولو مسوولیت رهبري پر غاړه ولرم او دغه محاسبه د امریکایانو حق دی.»
د سیاسي چارو کارپوهان وايي، له افغانستانه د امریکايي ځواکونو د وتلو پرېکړه د امریکا سنجول شوی پلان وو چې په اوږده او بې پایلې جګړه کې پاتې کېدلو یې ستونزې زیاتې کړې وې.
د دوی په خبره، امریکا د کورنیو اقتصادي فشارونو له امله هم دغه پرېکړه یوه اړتیا ګڼله او اوسنۍ ناندرۍ يې د خپلو کورنیو سیاسي اهدافو لپاره راپورته کېږي.
د سیاسي چارو شنونکی عزیز معارج وايي:« د امریکا دولت، د امریکا اداره، سیسټم، نظام، پالیسي، بهرنی سیاست، کورنی سیاست، هېڅ وخت دا قسم بې تدبیره کار نه کوي چې یو شی محاسبه نه کړي او عمل پرې وکړي، هغه هم پر نړیواله کچه، بنأ د دوی وتل له افغانستانه دا ټول محاسبه شوې ول، دې ته یې تدبیر نیولی وه، له ډېر پخوا.»
امریکايې چارواکي داسې مهال دا څرګندونې کوي چې له دې وړاندې هم د ولسمشر ډونالډ ټرمپ او نورو لوړو پوړو چارواکو يې له افغانستانه د امریکايې ځواکونو پر وتلو نیوکه کړې وه.
