د فراه ولایت بالابلوک ولسوالۍ اړوند بخش آباد بند د ۱۳۶۰ میلیون, مترمکعب اوبو د زېرمه کولو ظرفیت لري. د دې بند د جوړولو کارونه له تېرو څو کالو راهیسې روان دي.
تازه د فراه- فراهرود سندیزې حوزې مسوولین وایي، د بخش آباد بند د دوو انحرافي تونلونو چارې یې تر۸۰ سلنې بشپړې کړې دي او هڅه کوي چې پر ټاکلي وخت یې پای ته ورسوي.
د فراهرود سندیزې حوزې رییس برهان الدین مینه وال وايي: « ساختماني کارونه یې تقریبا ً تر ۸۰ سلنو مخکې تللي. باید ووایم چې سخت کارونه د هرې ورځې په تېرېدو خلاصېږي او یوازې تکمیلي کارونه روان دي. دا پاتې کارونه هم په سمه بڼه او چټکۍ سره مخکې روان دي.»
په همدې حال کې د پروژې مسوولین وایي، د بند اصلي او فرعي بنسټیزې چاري بشپړې شوې او پاتې چارې به یې تر راتلونکو شپږو میاشتو بشپړې شي.
د بخش آباد بند ساحوي انجینیر محمد وايي: « که څه هم د پروژې بشپړولو لپاره کافي اندازه وخت لرو، خو زموږ شرکت هڅه کوي چې دا پروژه له شپږو میاشتو مخکې بشپړه کړي. د دې کار لپاره د فراه ولس همکاري او دغه راز د محلي چارواکو همکاري هم ډېره اړینه ده. موږ ډاډ ورکوو چې د دوی په همکارۍ به پاتې کارونه له ټاکلي وخت وړاندې پای ته ورسوو.»
له دې سربېره، د فراه ځایي مسوولین په لوړ کیفیت د یاد بند د رغنیزو چارو ترسره کولو او په ټاکلي وخت د پروژې بشپړولو ډاډ ورکوي.
د فراه والي ویاند عبدالمالک اسامه وايي: « د فراه والي د یوه جګ پوړي پلاوي په ملتیا د دې بند له رغنیزو کارونو لیدنه او څارنه ترسره کړه، د انجینرۍ چارې یې له نږدې وڅارلې او ټولو اړوند ټیمونو ته یې سپارښتنه وکړه چې ورسپارل شي کارونه په ټاکلي وخت پای ته ورسوي.»
د چارواکو د مالوماتو له مخې، د فراه بخش آباد بند به د چارو له بشپړېدو وروسته د ۲۷ مېګاواټه برېښنا د تولید او ۱۰۰ زره هېکټاره کرنیزې ځمکې خړبولو ظرفیت ولري.
