د زابل ښاروال ملا عالم شاه مقبول وايي، د دای چوپان ولسوالۍ د بازار بیا جوړولو لپاره یې کار پیل کړی او پلان لري،چې د بازار تر جوړولو وروسته روغتیايي مرکزونه او ښوونځي هم بېرته فعاله کړي.
مقبول زیاته کړه:«د زابل دای چوپان ولسوالۍ لپاره د ښاروالۍ نوی مدیر ټاکل شوی دی، د زابل د ښاروالۍ له لورې منل شوی هم دی. موږ په لومړۍ قدم کې یادې ولسوالۍ وران شوی بازار د بیا جوړولو لپاره کار پیل کړی دی، په دغه بازار کې به نژدې ۵۰۰ هټۍ د سلامي امارت له لورې جوړې شي.»
د زابل دای چوپان هغه لیرې او وروسته پاتې ولسوالي ده،چې دوه لسیزو جګړې په کې ستر ویجاړی په میراث پرېښی دی، د جګړو پرمهال د دې ولسوالۍ بازار بشپړ ویجاړ شوی او نږدې هر کور زیانمن شوی دی.
ښار او ولسوالیو ته د دای چوپان لارې هم تړل شوې وې او اوسېدونکي يې د ژوند د هر ډول اسانتیاوو څخه بې برخې وو.
اخوا د دای چوپان اوسېدونکي خوښ دي،چې ویجاړ شوی بازار یې بېرته ابادېږي او له مسوولینو غواړي،چې ښوونځي او روغتیايي مرکزونه دې هم جوړ او بیا ودان کړي.
د دای چوپان ولسوالۍ یو تن اوسېدونکی وايي:« د دې بازار په جوړېدو سره به زموږ ټولې ستونزې حل شي. زموږ د ولسوالۍ ټولې تړل شوې لارې خلاصې شوې. موږ ډېر خوشاله یو،خو غوښتنه مو دا ده،چې زموږ د کلینیک او ښوونځیو غم دې هم وخوړل شي.»
د زابل دای چواپان ولسوالۍ وران شوی بازار داسې مهال بیا جوړېږي،چې د مسوولینو په خبره، یاده ولسوالي او مرکز کلات ښار کې ټولې غصب شوې،ځمکې به له غصب څخه خلاصې شي او اصلي مالکینو ته به وسپارل شي.
