د کار او ټولنیزو چارو وزارت د کار معین پروان ولایت کې د حرفوي زده کړو د یوه مرکز پرانیستې په مراسمو کې د وینا پرمهال وویل، اسلامي امارت هڅه کوي چې په بهرنیو هېوادونو کې د افغان کارګرو لپاره د کار موندنې زمینه برابره کړي.
زاهد احمدزي زیاته کړه، تازه شاوخوا ۵۰۰ ځوانانو ته د حرفوي زده کړو او ترڅنګ یې ۱۰۰ تنو ښوونکو ته په دې برخه کې د کار فرصت برابر شوی.
احمدزی په دې اړه وايي: « د کار او ټولنیزو چارو وزارت له هېواد د باندې په قانوني توګه د کارګرانو استولو پروسه په جدي توګه تعقیبوي او له ځینو هېوادونو سره په دې اړه ناستې هم شوې دي.»
پروان کې د حرفوي زده کړو د دې مرکز پلي کوونکي چارواکي وایي، هڅه کوي چې د دې پروژې په مرسته په یاد ولایت کې د ځوانانو لپاره د کار زمینې برابرې کړي.
د پروژې پلی کوونکی داین کېري وايي: « موږ د دې پروژې په مرسته پروان کې هڅه کوو چې د خصوصي سکټور په برخه کې د کوچنیو او متوسطو کاروباریانو ملاتړ وکړو او کاري زمینه ورته برابره کړو.»
په همدې حال کې د دې ولایت سیمه ییز چارواکي د یاد مرکز له جوړېدو خوښي څرګندوي او په دې برخه کې د لا زیاتو ښوونیزو او حرفوي پروګرامونو د پیل کېدو غوښتنه کوي.
د پروان والي محمد ادریس انوري وايي:« مسوولین یوازې خبرې نه کوي بلکې په عملي ډګر کې هم شته دي؛ هرځای چې تاسو پروګرام لرئ، درسره دي. هرځای چې کار مو بندېږي، مسوولین درسره ولاړ دي. موږ له تاسو بشپړ ملاتړ کوو او ستاسو د کار مخ کې به هېڅ ډول خنډونه پرې نه ږدو.»
د پروان د علماوو شورا مشر عبدالولي عابد قاري زاده وايي: « څومره چې امکان ولري، مسوولین باید زموږ د پروان ولس له خپل نظره او مهربانۍ ونه غورځوي. باید راشي او زموږ د خلکو مشکلات واوري. دلته ستونزې شته او تمه لرو چې د ولس او حکومت په ګډو هڅو حل شي.»
د چارواکو په خبره، د دې پروژې ټولیز لګښت ۲.۲ میلیونه امریکایي ډالره دی چې په پروان ولایت کې به شاوخوا ۶۰۰ ځوانانو ته حرفوي او مسلکي زده کړې ورکړي.
