د پاکستان بهرنیو چارو وزیر شاه محمود قریشي د ټرویکا غونډې پرانیستې وینا کې ویلي، چې نړیواله ټولنه باید د افغانستان اوسني حکومت سره مرسته وکړي او دغه هېواد له اقتصادي سقوطه وژغوري.
قریشي ویلي، افغانستان کې له شته ترهګرو عناصرو سره باید اغېزمنه مبارزه وشي.
د قریشي په وینا، اسلامي امارت له نړیوالې ټولنې سره مثبتې اړیکې غواړي او هېڅوک نه غواړي، چې افغانستان پر کورنۍ جګړه واوړي او بې ثباتي رامنځ ته شي.
قریشي زیاته کړې، دا د ټولې سیمې ګډ مسوولیت دی، چې افغانستان کې د ثبات او امنیت لپاره کار وکړي.
د پاکستان بهرنیو چارو وزیر دا هم ویلي، چې افغانستان کې د بې ثباتۍ له اړخه ټول اندېښمن دي په داسې حال کې، چې هلته امن او ثبات د هر چا په ګټه دی.
د قریشي په خبره، هېڅوک نه غواړي افغانستان له اقتصادي پلوه سقوط وکړي او د کډوالۍ نوی ناورین رامنځ ته شي.
