په کندهار ولایت کې د توتانو ټولوونکي او پلورونکي وايي، په دې موسم کې هر کال سلګونه ځوانان له بې کارۍ خلاصېږي او د توتانو په پېر او پلور بوخت وي.
دوی دغه کاري فرصتونه لنډ مهاله بولي خو زیاتوي چې د اقتصادي ستونزو د هواري لپاره یې ډېر مهم دي.
توت پلورونکی حافظ الله وايي: « زه دا توتان له ارغنداب راوړم، لومړی ترې لرګي او پاڼې پاکوم بیا یې په بازار کې خرڅوم، ترڅو خپل ورځنی ژوند وچلوم.»
د کندهار په لرو پرتو سیمو کې توتان وړیا ترلاسه کېږي خو مرکز او نورو ولایتونو ته د خرڅلاو لپاره یې سلګونه ځوانان په راټولولو بوخت دي.
توت ټولوونکی احمدالله وايي: « شکر دی ډېر خوښ یم، دا ځوانان له ارغنداب توتان راوړي او موږ یې دلته پلورو. موږ هم له دې لارې ۲۰۰ یا ۳۰۰ افغانۍ پیدا کوو، دوی هم.»
توت پلورونکی جانان آغا وايي: « توتان سږ کال ښه دي، اوبه یې ډېرې دي. کله چې کال آباد وي مېوه یې هم ښه وي. کاروبار یې هم ښه دی، خلک یې اخلي.»
توت اخیستونکي هم د کندهار توتان په مزه کې بې جوړې ګڼي او زیاتوي، په دې موسم کې د کندهار توتانو خوړولو او پېرلو لپاره د ولایت مرکز ته راځي.
د توتانو یو مینه وال حاجي ملال وايي: « موږ له هلمند راغلي یو، ترڅو په کندهار کې د توتو مېله وکړو. که څه هم سږ کال بې وخته بارانونو توتانو ته تاوان ورساوه، خو بیا هم ښه توتان پیدا کېږي.»
د توتانو خوښوونکی فېروز جان وايي: «زه هم هلمند څخه کندهار ته د توتانو لپاره راغلی یم. دلته د کندهار توتان نوم لري، حتا په دې باراني موسم کې هم ښه توتان پیدا کېږي. موږ هرکله د توتو په موسم کې راځو.»
توت د کندهار په یو شمېر ولسوالیو کې پیدا کېږي خو د ارغنداب ولسوالۍ توتان په مزه او قېمت کې تر نور غوره ګڼل کېږي.
سپین توت، بې دانه توت، کابلي توت، خالنجي توت او شاه توت په کندهار کې د توتانو له مشهورو ډولونو دي.
