یو تن بې ځایه شوی وايي:« که چېرته موږ ته دلته د کار زمینه برابره شي، نو ډېر به خوښ شو، که زمينه راته برابره نه شوه،اړ یو،چې له هېواده وتښتو.»
پر بې وزلو او کډوالو کورنیو دغه مرستې د افغانستان د بيا ودانولو او انرژۍ سپما موسسې له خوا تنظیم او وویشل شوې.
یاده موسسه وايي،د مرستو رسولو دغه لړۍ به تر ولایتونو هم ورسوي.
د افغانستان د بيا ودانولو موسسې کارکوونکی رسول خان وايي:« له دې وروسته زموږ خيریه ټولنه په پام کې لري،چې دغه مرستې خوست او ننګرهار ته وغځوو او هلته هم له بې وزله کورنيو سره مرستې تر سره کړو.»
په همدې حال کې د نړيوالو بشري مرستو د تنظيم ادارې مسولين وايي، ډېری نړيوالې موسسې لا هم افغانستان کې خپلو کارونو ته دوام ورکوي او ژر دی،چې نورو موسسو ته به هم زمينه برابره کړي،چې کارونه پيل او مرستې تر سره کړي.
کابل کې پر ۷۰ کورنیو دغه مرستې داسې مهال وېشل کېږي،چې د ملګرو ملتونو د وروستیو راپورونو له مخې،دا مهال ۲۳ میلیونه افغانان له فقر سره مخ دي او له نیمايي زیات افغانان بېړنیو مرستو ته اړتیا لري.
