ایران اروپا ته د افغان کډوالو تازه څپې په اړه خبرداری ورکړ

د ایران کورنیو چارو وزیر احمد وحیدي ویلي، که افغانستان سره نړیوالې مرستې ونه شي نو له دغه هېواد به اروپا ته د کډوالو نوی بهیر پیل شي.

وحیدي د انتقاد په ډول ویلي، هېڅوک افغانستان سره مرسته نه کوي او ولې یې پيسې کنګل شوي دي.

د ایران کورنیو چارو وزیر ویلي، هره ورځ د ایران سرحد ته زرګونه افغانان ورځي او د کور کلي پرېښودل د مجبوریت له مخې دی.

د ایران د کورنیو چارو وزیر زیاته کړې، هېواد یې اوسمهال د درې نیم میلیونه افغان کډوالو کوربه دی.

 هغه زیاته کړې، پر افغانستان د اسلامي امارت له واکمنېدو وروسته ګڼ شمېر نور هم هڅه کوي له هغه هېواده ووځي.