د افغانستان بهرنیو چارو وزارت وايي، د دغه وزارت چارسمبالي وزیر امیرخان متقي پر مشرۍ به یو لوړ پوړی پلاوی نن پاکستان ته ولاړ شي.
د یاد وزارت ویاند عبدالقهار بلخي د اړیکو پیاوړتیا، اقتصاد، ترانزیټ او ولسونو ته په تګ راتګ کې د اسانتیاوو زیاتوالی هغه موضوعات یادوي،چې په دغه سفر کې به دواړه خواوې پرې بحثونه وکړي.
بلخي پر خپله ټویټرپاڼه لیکلي:«پلاوی به د اړیکو په پیاوړتیا، اقتصاد، ترانزیټ، مهاجرینو او ولسونو ته په تګ راتګ کې د سهولتونو پر زیاتوالي خبرې کوي. په پلاوی کې د مالیې او تجارت وزیران او کاري ګروپونه هم شامل دي.»
پاکستان ته دافغانستان د دې باصلاحیته جګپوړوي پلاوي سفر له بل لوري په دې مهم ګڼل کېږي،چې پاکستاني طالبان له خپل حکومت سره په اوربند سلا شوي دي.
د پاکستان حکومت ویلي، دې مذاکراتو کې منځګړیتوب د افغان طالبانو په وساطت شوی او ښایي دا اسلام اباد ته د کابل یوه خوږه ډالۍ هم اوسي.
اسلام اباد ته داسلاميامارت پلاوي سفر ته په دې سترګه کتل کېږي،چې دواړه لوري به له یو بل سره مخامخ خپلې اندېښنې او غوښتنې شریکې کړي.
پاکستانی خبریال طاهرخان وايي:« پاکستان ته د افغانستان د بهرنیو چارو چارسمبالي وزیر سفر مهم دی، ښايي برخه واخلي غونډه کې،ځکه پاکستان یوازنی هېواد دی،چې طالبانو استازو ته یې اجازه ورکړه،چې سفارت او کونسلګري پرېږدي او کارونه پرمخ یوسي. غونډې مهمې دي،مخامخ د افغانستان چارواکو وزیرانو سره ناستې وشي،تشویشونه شریک شي او افغانستان ستونزې هم واورېدل شي.»
اسلام اباد تل کابل ته د مرستې ژمنه ورکړې،خو په عمل کې داسې څه نه دي لیدل شوي چې افغانستان خوښ کړي.
اوس تمه کېږي،چې پاکستان به د اسلامي امارت پر وړاندې د نړیوالو غبرګونونو په اړه کابل ته د همکارۍ ډاډ ورکړي.
د پوهنتون استاد فیض محمد ځلاند وايي، پاکستان او افغانستان خپلو کې ګډ مسایل لري او په راشه درشه کولای شي،خپلې ستونزې حل کړي.
ځلاند زیاته کړه:« پاکستان له افغانستان سره ګډ مسایل لري اقتصادي،سیاسي او امنیتي او له دې ور اخوا کوښښ کوي،چې د اسلامي امارت له لوړپوړي چارواکو سره په راشه درشې خپلې اقتصادي ستونزې د افغانستان په اډانه کې حل کړي. له پاکسنان سره ډیورنډ کرښې په اوږدو کې امنیتي مسایلو باندې ګډه هوکړه رامنځ ته شي او په لویه کې د اسلامي امارت پر وړاندې د نړیوالو غبرګونونو په اړه خپله همکاري اعلان کړي.»
له دې وراخوا ټاکل شوې ده،چې د روانې نومبر میاشتې پر یوولسمه اسلام اباد کې د چین، روسیې،پاکستان او امریکا ترمنځ ګډه ناسته هم وشي.
