Skip to content
ټاکل شوې ده،چې د چهارشنبې په ورځ د هند په کوربتوب په نوي دهلي کې د افغانستان په تړاو ستره ناسته جوړه شي.
دغې ناستې ته د افغانستان لهګاونډیانو سربېره د سیمې هېوادونو د ملي امنیت شورا سلاکاران هم وربلل شوي دي.
اسلاميامارت دغه ناسته ګټوره بللې او تمه لري،چې ګډون کوونکي هیوادونه به له نړۍ وغواړي چې افغانستان سره مرستې وکړي او نوي حکومت په رسمیت وپيژني.
خو د سیاسي چارو شنونکو باور بیا بل ډول دی او تمه نه لري،چې دهند ناسته کې دې د رسمیت پيژندو په تړاو بحث وشي.
شنونکی جاوید جاوید واييي:« هند اوس غواړي،چې خپلې امنیتي اندیښنې په سویلي اسیا کې رفع کړي، په همدې موخه یې دغه ناسته جوړوي. دغه ناسته به د اسلامي امارت د رسمیت پیژندنې په مانا نه وي، خو په ټوله کې د اسلامي امارت لپاره یو پرمختګ ګڼل کېږي.»
شنونکي وايي، ناسته کې د کابل او اسلام اباد پلاوو نه موجودیت دغه ناسته ننګولې او د ناستې موثریت یې له منځه وړی دی.
دوی په دې باور دي،چې د هند ناسته د دغه هېواد د خپلو موخو لپاره جوړیږي او د سیمې هېوادونه به په کې خپلې اندیښنې له یوبل سره شریکې کړي.
شنونکی عزیزمعارج وايي:« د هند په ناسته کې د افغانستان او ګاونډي هېواد پاکستان پلاوي ګډون نه کوي، ښايي دغه ناسته د خپلو اهدافو او د سیمې د امنیت لپاره وي او د سیمې هېوادونه خپلې اندیښنې په کې شریکې کړي او ګمان نه کېږي،چې په دغه ناسته کې دې افغانستان په رسمیت وپیژندل شي او یا هم د افغانستان دک نګل شویو پیسو خلاصون کوم غږ پورته شي .»
په ورته مهال ټاکل شوې ده،چې د هند له ناستې یوه ورځ وروسته د راتلونکې پنجشنبې په ورځ په اسلام اباد کې د کابل په تړاو ناسته جوړه شي،چې د افغانستان د بهرنیو چارو سرپرست وزیر، د امریکا او چین استازي به هم په کې ونډه ولري.
