د ملګرو ملتونو د بشري مرستو همغږې کوونکې ادارې(اوچا) په یوه تازه راپور کې ویلي، په تېر ۲۰۲۴زېږدیز کال کې یې د بسپنه ورکوونکو هېوادونو له لوري ۷۴ میلیونه ډالره ترلاسه کړي او په بېلابېلو ولایتونو کې یې پر ۲.۸ میلیونه افغانانو وېشلي دي.
د راپور یوه برخه: « په ۲۰۲۴زېږدیز کال کې د افغانستان بشري مرستو صندوق ټوله تمویلي بودیجه ۷۴.۴ میلیونه ډالر وه. هالنډ، اسټرالیا، جرمني او انګلستان د دې مرستو لوی تمویلونکي وو. تېر کال دې صندوق په کابل، ننګرهار، کندهار او بادغیس کې ۲.۸ میلیونه خلکو ته مرستې رسولې دي.»
اوچا د خپل راپور په یوه بله برخه کې اټکل کړی چې روان کال به په افغانستان کې خلک د اقلیمي بدلون ناوړه پايلو، د خوراکي توکو کمښت او تغذیې له بحران سره مخ وي چې په خبره یې دوامداره تمویل ته اړتیا لیدل کېږي.
د راپور یوه برخه: « په ۲۰۲۵زېږدیز کال کې به افغانستان له اقلیمي بدلون، وچکالۍ، د خوړو له شدید کمښت او د تغذيې له بحران سره مخ وي. د دې ستونزو پر وړاندې دوامداره تمویل، د ښځو ملاتړ، سیمه ییزو ادارو ته د صلاحیت ورکول او د انساني حقونو خوندیتوب ډېر اړین دي.»
د اقتصادي چارو یو شمېر شنونکي هم په افغانستان کې د ملګرو ملتونو او ځينو نورو نړيوالو بنسټونو هغه ادعا تاییدوي چې په افغانستان کې د لوږې کچه لوړه شوې او د راټيټولو لپاره يې د مرستو د دوام ترڅنګ د داسې مکانېزمونو په رامنځته کولو کې د همکاريو غوښتنه کوي چې خلکو ته د کاري فرصتونو په برابرولو سره د دوی اوږدمهاله اقتصادي ځان بسیاينه تضمين کړي.
د اقتصادي چارو شنونکی محمد یونس ځدارڼ وايي: « دا منو چې د افغانستان خلک مرستو ته اړتیا لري، خو داسې مرستو ته اړتیا نه لري چې د لنډې مودې لپاره وي. که دوی واقعا ً غواړي مرسته وکړي، نو خلکو ته باید د کار زمینه برابره کړي.»
د اقتصادي چارو شنونکی نورالله عزیز وايي: « په دې کې تر ډېره برید حقایق دي، ځکه که چېرې موږ په دې وروستیو کې د مهاجرینو راتګ ته وګورو، د بېکارۍ کچې ته وګورو، دغه راز په دولتي ادارو کې روان تنقیص ته وګورو او یا هم په ټولیزه توګه مارکېټ کې د اقتصادي ستونزو موضوع ته او د نړیوالې پانګې نه شتون موضوعاتو ته وکتلی شي، ټول هغه څه دي چې د افغانستان داخلي مارکېټ یې د کارګرانو لپاره ضعیفه کړی دی.»
له دې وړاندې د ملګرو ملتونو اړوند ادارو ادعا وکړه چې دامهال په افغانستان کې ۲۳.۹ ميليونه خلک بشري مرستو ته اړتيا لري او له ډلې يې شاوخوا ۱۴ميليونه له شديدې لوږې سره مخ دي.
