Skip to content
د افغانستان لپاره د امریکا بهرنیو چارو وزارت ځانګړی استازی توماس وېسټ یو شمېر اروپايي او اسیايي هېوادونه ته سفر کوي.
وېسټ وايي، د دې سفر پر مهال به د امریکا له متحدانو سره د افغانستان د پرمختګ په لارو چارو خبرې وکړي
هغه پر خپله ټویټرپاڼه لیکلي، ویاړي چې دا دنده پر غاړه اخلي او تر خوا یې د امریکا د حیاتي ګټو پرمختګ او د افغانانو ملاتړ ته هیله مند دی.
د امریکا د بهرنیو چارو وزیر انتوني بلېنکن هم پر خپله ټویټرپاڼه له توماس ټام وېسټ سره د لیدنې تصویر خپور کړی او لیکلي یې دي، هغه به افغانستان ته له سفر وړاندې له نړیوالو شریکانو سره د افغانستان د مسایلو په اړه مشوره او خبرې وکړي.
د وېسټ یوه مهمه دنده د افغانستان د مسایلو په اړه د سیمې او نړۍ د هېوادونو یوه خوله کول دي، هغه چې زلمي خلیلزاد د دې اجماع له جوړېدو په ځلونو یادونه وکړه، خو پایله یې معکوسه وه.
ټام وېسټ تېره میاشت د زلمي خلیلزاد له استعفا وروسته، د هغه ځای ناستی وټاکل شو.
