سره له دې چې افغانستان د اوبو پراخې سرچینې لري، خو لاهم په لرو پرتو ولایتونو کې یې پر کرنه سربېره د څښاک لپاره کافي اوبو ته لاسرسی د سرپرست حکومت او خلکو لپاره لویه ننګونه ده.
اوبو ته د خلکو د لاسرسي کمېدل او د اقلیمي بدلون اغېزې هغه څه دي چې هېواد کې يې د بزګرانو ستونزې ډېرې کړې او اړتیا ده چې مرستندویه ادارې او نړیوال سازمانونه په دې برخه کې همکاري ډېره کړي.
تازه د ملګرو ملتونو د بشري مرستو د همغږۍ دفتر(اوچا) ویلي، ملګرو ملتونو افغانستان کې له زیانمنېدونکو ټولنو سره د مرستو لپاره ۱۶.۶میلیونه ډالر ځانګړي کړي چې موخه يې د افغانستان په شمال او شمال ختیځو ولایتونو کې د وچکالۍ د اغېزو مهار دی.
د اوچا په خبره، د دغو پیسو۱۰ میلیونه ډالر د افغانستان د بشري مرستو له صندوق او پاتې ۶.۶ میلیونه ډالر د بېړني غبرګون نړیوال صندوق له خوا ځانګړې شوي دي.
اوچا په دې اړه ویلي:« نن ملګرو ملتونو د افغانستان د شمال او شمال ختیځ له زیانمنو شویو ټولنو سره د وچکالۍ د اغېزو کمولو لپاره ۱۶.۶ میلیونه ډالر مرسته اعلان کړه.»
سره له دې چې د سیاسي چارو کارپوهان وچکالي طبیعي پدیده بولي او مخنیوی یې اسانه نه ګڼي، خو د مخنیوي لپاره يې د بېلا بېلو لارو ازمویلو سپارښتنه کوي.
دوی د ونو او شنو سیمو پر ډېرولو سربېره، له نړیوالې ټولنې په دې برخه کې د همکاریو پر دوام ټینګار کوي.
د سیاسي چارو کارپوه شهزاده مسعود وايي: « زما په اند، په اوسنیو شرایطو کې نړیوالې ټولنې ته په کار ده چې د افغانستان له مظلوم ولس سره د ژوند په هره برخه کې مرستې وکړي، په ځانګړې توګه د تعلیم په برخه کې. په افغانستان کې طبیعي پېښې ډېرې کېږي، وچکالي دومداره ده او زه امېد کم چې نړیواله ټولنه تر زیاتو کلونو پورې افغانستان کې خپلو بشري مرستو ته ادامه ورکړي.»
افغانستان چې پراخې اوبیزې سرچینې لري، د دې برخې کارپوهان د اوبو پر مدیریت ټینګار کوي.
دوی وايي، سره له دې چې اقلیمي بدلون پر ټولې نړۍ منفي اغېز کړی، خو که په کوردننه د باراني اوبو ډنډونه، د روانو اوبو مهارولو او دې برخې ته د مسوولو ادارو پاملرنه ډېره شي، ورسره به هېواد کې د وچکالۍ مخنیوی ممکن او اوسمهالې ستونزې راکمې شي.
