په تورخم کې له خيبرپښتونخوا او پاکستانه د راستنېدونکو افغانانو لپاره ځانګړي شوي پنډغالي کې د دولتي، خصوصي او نړیوالو ادارو له خوا بېلابېل خدمتونه او په ځانګړې توګه روغتيايي خدمتونه وړاندې کېږي.
اوس مهال پر حکومتي ادارو سربېره د یو شمیر خصوصي ادارو له خوا هم دغې برخې ته پام وراوښتی او د راستنو شویو په پنډغالي کې هر ورځ نوي روغتیايي مرکزونه جوړوي.
د یوه روغتیايي مرکز مسوول محمد صادق حلیمزی وايي: « موږ له ځان سره روغتیايي پرسونل لرو او روغتیايي کارکوونکي هم له متخصص نیولې تر اېم.ډي پورې ټول له موږ سره شته دي. موږ دلته د عمومي داخلې، ماشومانو او او.پي.دي څانګې لرو.»
تازه راستانه شوي په دې پنډغالي کې د وړاندې کېدونکو خدمتونو له امله خوښ دي، خو ټینګار کوي چې حکومت دې يې د بیا مېشتېدنې، سرپناه او ورته د کاري فرصتونو برابرولو غم هم وخوري.
له پاکستان راستون شوی کډوال وايي:« له حکومت غوښتنه کوو چې موږ له هغه ځایه راغلي یو، دلته مو ځای ځایګی نه شته. د پاکستان حکومت پر موږ ظلم وکړ، ما هلته ۱۶ کاله عمر تېر کړ، اوس چې وطن ته راغلی یم دلته له وړاندې کېدونکو خدمتونو او ډاکټرانو ډېر خوښ یم او مننه ترې کوم.»
له پاکستانه یو بل راستون شوی کس وايي: « زه به له دې ځایه ځم خپل ولایت ته، ځمکه نه شته، پوله،پټی او کور نه شته، حال دا چې د کور جوړولو وس هم نه لرو.»
له بلې خوا، د ننګرهار کډوالو چارو ریاست مسوولین بیا وايي، ټولو راستنو شویو هېوادوالو ته د کاري زمینوبرابرولو ترڅنګ د دوی اولادونو ته د ښوونې روزنې اسانتياوې برابروي او د سرپناه په موخه به پرې ځمکې ووېشل شي.
د ننګرهار کډوالو چارو ریاست مالي او اداري آمر ذاهدالله ذاهد وايي: « د راستنو شویو کډوالو په خپلو ولایتونو کې به هرې پنځه کسیزې کورنۍ ته پنځه بسوې ځمکه ورکول کېږي، له پنځو تر لس کسیزې کورنۍ ته به ۱۰ بسوې ځمکه ورکول کېږي او له دې زیاتو ته هم ۱۵ بسوې. دا ځمکه به دوی ته دلته د راجسټر له مخې ورکول کېږي.»
دا په داسې حال کې ده چې د تورخم عمري پنډغالي د مسوولو کسانو له مالوماتو سره سم، اوس مهال افغانستان ته له پاکستانه د کډوالو د بېرته راتګ اندازه کمه شوې او هره ورځ له ۲۵۰ تر ۳۰۰ کورنیو پورې کډوال هېواد ته راستنیږي.
