د ملګرو ملتونو کډوالو سترې کمېشنرۍ(یو.اېن.اېچ.سي.آر) د تازه راپور له مخې، د تېرو لسو کالو پرمهال په ټوله نړۍ کې د کډوالۍ پر ناقانونه لارو له ۷۲ زرو ډېر کسان مړه او یا تري تم شوي چې له دې ډلې ۵ زره مړه شوي کسان يې يوازې افغانان دي.
راپور کې ویل شوې، د ناقانونه لارو نږدې درې پر څلورمه برخه قربانیان هغه کسان دي چې له جګړو، ناامنیو او انساني ناورینونو په بهرنیو هېوادونو کې د پناه اخیستنې په موخه خپل اصلي هېوادونه پرېږدي.
د راپور یوه برخه:« د مرکزي مدیترانې لاره د کډوالۍ لپاره د نړۍ تر ټولو مرګونې لاره ده. په تېره یوه لسیزه کې په دې سمندر کې نږدې ۲۵ زره کسان مړه شوي دي. په دې موده کې په ناورینونو کې د راګیر۴۰ هېوادونو ۵۲ زره کسان د تېښتې پرمهال مړه شوې دي.»
د راپور د موندنو له مخې، افغانان هم د دغو مړو شویو او لا درکه کډوالو برخه تشکیلوي.
غلام حضرت شاوخوا څلور کاله مخکې د ښه راتلونکي په نیت خپله کورنۍ پرېښوده او له کوره د ترکيي په نیت ووت، خو تر اوسه يي مړی ژوندی ورک دی.
مور او پلار ته يې یوازې تصویرونه پاتې دي او اوس هم په دې تمه ناست دي چې ګوندې بيا به کور ته ورشي.
د نوموړي پلار چې د ورک شوي غلام حضرت تصویر يې په سینه پوري نیولی، په غرېو نيولي غږ او په اوښکلنو سترګو د ورک شوي زوی د مړی او ژوندي پيدا کېدو غوښتنه کوي.
د غلام حضرت پلار وايي: « آخري خاطره دا وه چې ما ورته اجازه نه ورکوله، بیا ټولو ما ته مخ را واړوه چې اجازه ورکړه لاړ شي، ځکه نور ځوانان ځي دی دې هم لاړ شي. تر ما پورې ټول ځورېږي، په ټولو ډېر ګران و، ډېر ښه اخلاقي وړکی و.»
مور يې چې تر نورو ډېر د غلام حضرت د ورکېدو غم ګالي وايي، زوی يې د اقتصادي ستونزو له امله اړ شو چې په قاچاقې لارو ترکيې او بيا اروپا ته لاړ شي، خو د ناڅرګند راتګ په تمه يې هره شپه سبا او سبا شپه کوي.
د غلام حضرت مور وايي: « هر وخت را یادېږي، که بېرته راغی واده ورته کوم؛ شپه ورځ یې په فکر کې یم. هره شېبه را یادېږی، شپه او ورځ د چې تېرېږي. زما غوښتنه دا ده چې بچی مې راته پیدا کړي.»
باور دا دی چې د جګړو او اقتصادي ناورینونو له امله بهر ته په ناقانونه لارو د تلونکو مړو او ورکو شویو کسانو شمېر ښایي له دې هم لوړې وي.
دا په داسې حال کې ده چې د نړۍ په ډېرو برخو کې سیاسي، اقتصادي او اقلیمي ناورینونو د اجباري کډوالۍ پراخه څپه رامنځته کړې ده.
