د عامې روغتیا وزارت چارواکو د یوه خبري کنفرانس پرمهال په هېواد کې د درملو، روغتیايي محصولاتو او همدا راز د خوراکي توکو د کیفیت او په دې برخه کې د چارو د تنظیم په تړاو له رسنیو سره مالومات شریک کړل.
دعامې روغتیا وزارت سرپرست نور جلال جلالي ناستې ته خبرو کې وویل، په دې وروستیو کې د بشري مرستو په نوم افغانستان ته په زیاته اندازه بې کیفیته توکي راوړل شوي دي.
جلالي زیاته کړه، یوازې د خوړو نړیوال سازمان نږدې ۷ زره میټریک ټنه خوراکي توکي چې د بشري مرستو په نوم د ښځو او ماشومانو د تغذیې په موخه افغانستان ته را وارد کړي، د خریدارۍ پرمهال یې د خوړو خوندیتوب معیارونه په پام کې نه دي نیولي او خپل کیفیت یې له لاسه ورکړی چې اوس د استفادې وړ نه دي.
د جلالي په خبره، د نړیوالو معتبرو ادارو له لوري د توکو د خریدارۍ په وخت کې د خوړو خوندیتوب معیارونه په پام کې نه نیول کېږي او بیا د بشري مرستو په نوم بې کیفیته توکي افغانستان ته راوړل کېږي او په هېواد کې د ناروغیو او مړینې لامل ګرځي.
جلالي په دې اړه وايي: « د خوړو نړیوال پروګرام (ډبلیو.اېف.پي) د ۶۷۵۰.۲۰ مېټریک ټنه په مقدار سوپرسریل مواد چې د بېلابېلو غله جاتو ترکیب دی، د ښځو او ماشومانو د تغذیې په موخه افغانستان ته را وارد کړي، خو متأسفانه دغه لوی مقدار مواد چې افغانستان ته د بشري مرستو په نوم راوړل شوي، د خریدارۍ پرمهال یې د خوړو د خوندیتوب معیارونه په نظر کې نه دي نیول شوي. په پایله کې ستره اندازه موادو افغانستان ته د راوړلو په وخت کې خپل کیفیت له لاسه ورکړی او اوس د استفادې وړ نه دي. افغانستان ته د بشري مرستو په نوم د بې کیفیته خوراکي توکو واردول زموږ د هېوادوالو د ناروغۍ او حتا د مرګ او میر سبب ګرځي.»
همداراز دعامې روغتیا وزارت چارواکي وايي، د ملګرو ملتونو پراختیايي پروګرام (یو.اېن.ډي.پي) چې د توبرکلوز یا نري رنځ نارغۍ د تشخیص په برخه کې له عامې روغتیا وزارت سره همکاري کوي، د دې ناروغۍ د تشخیص لپاره یې وارد کړي کېټونه له څېړنو وروسته معلومه شوې چې پر دغو کېټونو وخت تېر دی او اېکسپایر شوي دي.
د دوی په خبرو، دغو ادارو خپله ستونزه منلې هم ده.
دعامې روغتیا وزارت د درملو او روغتیايي محصولاتو د تنظیم رییس نعیم الله ایوبي وايي، د درملو، خوراکي توکو او همدا راز د روغتیايي محصولاتو د کیفیت د کنټرول او د چارو د ښه تنظیم لپاره یې ځانګړی طرزالعمل جوړ کړی.
ایوبي خبرداری ورکوي چې هغه کارخونې او یاهم واردونکي او صادرونکي شرکتونه چې په دغو برخو کې کار کوي، له طرزالعمل د سرغړونې په صورت کې به له قانوني چلن سره مخ شي.
ایوبي زیاتوي:« د چارو د ښه تنظیم او کارونو پر وخت اجرا کولو په موخه، د درملو، روغتیايي محصولاتو او خوراکي توکو په برخه کې یو جامع طرزالعمل جوړ او د ریاست الوزرا عالي مقام له خوا یې منظوري ترلاسه شوې. اوس مهال ټولې چارې د همدې منظور شوي طرزالعمل په رڼا کې پرمخ وړل کېږي. په دې طرزالعمل کې یو شمېر تأدیبات هم ذکر شوي. هر هغه څوک چې له قوانینو او له دې طرزالعمل سرغړونه کوي، دغه تأدیبات به ورباندې عملي کېږي.»
عامي روغتیا وزارت له ټولو هغو هېوادونو چې په یادو برخو کې له افغانانو سره د موسساتو او یاهم نړیوالو سازمانونو له لارې مرستې کوي، غواړي چې د مرستو ښه مدیریت او همدا راز اغیزمنتیا او کیفیت ته جدي پام وکړي.
