د ملګرو ملتونو ویاند په خپل وروستي خبري کنفرانس کې د افغانستان بشري وضعیت ته په اشارې ویلي، په افغانستان کې د بودیجې له کمښت سره مخ دي.
سټېفن دوجاریک ویلي، سره له دې چې دا مهال د افغانستان شاوخوا ۲۳ میلیونه وګړي نړیوالو مرستو ته اړتیا لري، خو دغه وضعیت ته د رسېدنې لپاره کافي بودیجه په واک کې نه لري.
نوموړي زیاته کړې، هېواد ته په بشري چارو کې د انټونیو ګوتیرېش مرستیال ټام فلېچر سفر او له ګڼو افغان چارواکو سره لیدنو ته اشاره کړې او ویلي یې دي چې نوموړي په دې ناستو کې له افغانستان سره د مرستو د دوام ډاډ ورکړی.
دوجاریک زیاته کړې: « په افغانستان کې زموږ د بشرپاله همکارانو د مالوماتو له مخې، دا مهال ۲۳ میلیونه افغانان چې د ټول نفوس نیمايي برخه جوړوي، داسې مهال ژوند ژغورونکو بشري مرستو ته اړتیا لري چې ملګري ملتونه او شریکان یې هلته د بسپنې له ژور کمښت سره لاس او ګرېوان دي.»
بل پلو، د ملګرو ملتونو د بشري مرستو د همغږۍ ادارې (اوچا) مشر ټام فلېچر د اقتصاد وزارت له سرپرست سره په لیدنه کې دواړو د بشري مرستو او په ځانګړي ډول د پراختیايي مرستو پر دوام ټینګار کړی چې د کاري فرصتونو رامنځته کېدو او د کورنیو اقتصادي ودې لامل بلل کیږي.
د چارو شنونکي بیا د نړیوالو مرستې که څه هم اغېزناکې خو لنډمهاله ګڼي او وايي، ښايي دا مرستې په راتلونکي کې راکمې او ان په بشپړ ډول بندې شي.
د دوی په بارو سرپرست حکومت ته په کار ده چې په اوږدمهال کې پر دغو مرستو د اتکا د راکمولو لپاره باید د پراختیايي لویو پروژو د عملي کولو له لارې کاري فرصتونو د ایجادولو ترڅنګ، ورسره په هېواد کې د بېوزلۍ کچه راټیټه شي.
د اقتصادي چارو شنونکی عبدالنصیر رشتیا وايي: « بشري مرستې یو ځل مصرف دي او په لنډمهاله کې کولی شي هېواد کې له بېوزلۍ مخه ونیسي. دا مرستې په دایمي بڼه نه دي بلکې یوه ورځ کمېږي او ښايي یو وخت په بشپړه توګه بندې شي. اړتیا ده چې د افغانستان حکومت خپله هڅه وکړي، خپل ستراتیژيک او اقتصادي پلانونه او پروګرامونه ولري، ترڅو وکولی شي اقتصادي پراختیايي پروژو ته حرکت ورکړي، پانګونه جذب او زیاته کړي، ترڅو خلکو ته د کار زمینه او دایمي عاید برابر شي او له امله یې په هېواد کې د بېوزلۍ کچه هم راټیټه شي.»
د ملګرو ملتونو په مرستو کې د کمښت خبر داسې مهال دی چې څه موده وړاندې امریکا د خوړو نړیوال پروګرام له لارې له افغانستان سره د مرستو ځنډولو خبر ورکړی و.
