د اسلامي امارت د بهرنیو چارو وزارت سرپرست امیرخان متقي د قطر هېواد په بلنه د یو پلاوي په مشرۍ دوحې ته په رسمي سفرتللی.
ټاکل شوې چې متقي د کوربه هېواد له چارواکو سره په دوه اړخیزو سیاسي، اقتصادي او تجارتي مسایلو خبرې او بحثونه ولري.
د بهرنیوچارو وزارت مرستیال ویاند احمد ضیا تکل وايي، د بهرنیو چارو وزارت سرپرست به په قطر کې له مېشتو افغان سوداګرو سره هم وګوري او د دوی د ستونزو پرحل به خبرې وکړي.
د تکل په خبره، قطر ته د سفر پرمهال به امیرخان متقي په دوحه کې مېشتو بهرنیو ډېپلوماتانو او سیاسي استازو سره هم په څو اړخیزو مسایلو لیدنې ولري.
تکل په دې اړه وايي: « د افغانستان اسلامي امارت د بهرنیو چارو وزیر محترم مولوي امیر خان متقي د یوه پلاوي پر مشرۍ د قطر هېواد د بهرنیو چارو وزارت د وزیر په رسمي بلنه هغه هېواد ته په رسمي سفر روان شو. ټاکل شوې چې د بهرنیو چارو وزیر به د قطر د بهرنیو چارو وزیر ترڅنګ، له یو شمېر نورو قطري چارواکو سره په دوه اړخیزو سیاسي، اقتصادي او تجارتي مسایلو خبرې اترې ولري. دغه راز به د بهرنیو چارو وزیر د خپل سفر په ترڅ کې له قطر مېشتو افغان سوداګرو او نور خلکو سره هم ناستې ولري او د هغوی نظریات، ستونزې او مشکلات به واوري. همدارنګه امېد دی چې د بهرنیو چارو وزیر به له قطر مېشتو بهرنیو ډېپلوماټانو سره هم ګډې ناستې ولري او په څو اړخیزو مسایلو به خبرې وکړي.»
د سیاسي چارو کارپوهان په اوسنیو شرایطو کې قطر ته د امیرخان متقي سفر له سیاسي پلوه د افغانستان لپاره ارزښتناک بولي او زیاتوي، قطر د افغانستان او نړۍ ترمنځ د سیاسي اړیکو د ټینګښت په برخه کې د پله حیثیت لري.
د سیاسي چارو شنونکی شهزاده مسعود وايي: « قطر ته د بهرنیو چارو ښاغلي وزیر امیرخان متقي سفر یو ځانګړی اهمیت لري؛ ځکه چې له قطر سره له پخوا روابط ښه وو. قطر یو داسې هېواد دی چې له نړۍ سره د افغانستان اړیکو ټینګولو لپاره د یوه پل حیثیت لري. زه هیله لرم سره له دې چې قطري چارواکو سره ګوري، په قطر کې د نوور هېوادونو له ډېپلوماټانو سره هم په مختلفو مسایلو خبرې ولري.»
ځينې نور بیا په دې باور دي چې دا سفر به نه یوازې د قطر او افغانستان ترمنخ د اړیکو لا ټینګښت په برخه کې شته مسایل حل کړي، بلکې د نړۍ او افغانستان ترمنځ د رامنځته شوي واټن په لنډېدو کې به هم ګټور تمام شي.
دوی زیاتوي، یوازینۍ لاره چې افغانستان کولی شي په لنډه توګه نړیوال رسمیت ته ورسوي، قطرهېواد دی چې اوس باید له رامنځته شویو فرصتونو په بشپړه توګه ګټه واخیستل شي.
د پوهنتون استاد فیض محمد ځلاند وايي: « دا به نه یوازې له قطر هېواد سره د افغانستان د اړیکو په تړاو شته غوټې پرانیزي، بلکې له نړۍ سره د ډېپلوماسۍ لپاره د یوه دهلېز په توګه هم دا د متقي لپاره یو ښه فرصت دی، ترڅو وکولی شي هغه واټن را لنډ کړي چې د نړیوالو حکمي او حقوقي شخصیتونو او د افغانستان د سرپرست حکومت ترمنځ موجود دی او دغه راز پر هغو مسایلو خبرې وکړي چې د افغانستان د اوسني حکومت د رسمیت پېژندلو او تعامل پر وړاندې یې د پوښتنې په توګه مطرح دي، ترڅو موږ وکولی شو دغه ازغن مزل ژر ووهو.»
قطر ته د اسلامي امارت د بهرنیوچارو وزارت سرپرست سفر داسې مهال ترسره کېږي چې د ملګرو ملتونو امنیت شورا د بندیزونو کمېټې په یوه اعلامیه کې ویلي، امیرخان متقي ته یې د یوې اوونۍ لپاره د سفر معافیت ورکړی.
دغې کمېټې د امیرخان متقي پر سفرونو د بندیز معافیت د روانې اپرېل میاشتې له ۲۷ نیټې د مې میاشتې تر څلورمې نېټې پورې تصویب کړی، ترڅو په دې موده کې له قطري چارواکو سره لیدنې ولري.
