د امر بالمعروف، نهې عن المنکر او شکایتونو اورېدلو وزارت محتسبینو دوه تنه د کابل ښار د دیارلسمې امنیتي حوزې له اړوند سیمې د اسنادو او شواهدو پر بنسټ د کوډو، جادو او سحر په تور نیولي دي.
دوی اعتراف کړی چې له شاوخوا ۱۰ کلونو راهیسې پر دې کار بوخت وو او له همدې لارې یې ډېرې پیسې ترلاسه کړې دي.
دوی په خپلو اعترافونو کې کوډې او جادو یو ناوړه او ناروا عمل بولي او له نورو غواړي چې له دغه عمله لاس واخلي.
یو تن نیول شوی کوډګر وايي: « له دوه او درې تر شلو زرو افغانیو مې اخیستې، خو ډېر خلک یې نه ورکوي. کوډګر باید دا کار ونه کړي، باید له خدایه وډار شي، دا ډېر بد کار دی.»
ورته مهال نیول شوي کسان له جادوګرۍ پرته د اخلاقي فساد په تور هم تورن دي، خو اوس د پښېمانۍ څرګندولو ترڅنګ جادوګري یو ناوړه عمل بولي او زیاتوي چې له خپل دغه عمله پښېمانه دي او ژمنه کوي چې نور به دا عمل نه ترسره کوي.
یو بل نیول شوی کوډګر وايي: « زه له خپل کړي کار او کردار پښېمانه یم، زر ځله پښېمانه یم. ژمنه کوم چې نور به په خپل ټول عمر کې دا کار ونه کړم، که بیا مو زه په دې کار ولیدم، هر سزا چې راکوئ، منم یې.»
په ورته وخت کې یو شمېر دیني عالمان کوډګري او سحر د شریعت او اسلامي احکامو له مخې حرام بولي او زیاتوي، دا کار نه یوازې د خرافاتو او انحرافاتو د خپرېدو لامل کېږي، بلکې د سترو ګناهونو له ډلې هم شمېرل کېږي.
دیني عالمان او عام خلک له سرپرست حکومته غواړي چې د دې ناوړه پدیدې مخه ونیسي.
دیني عالم شیخ عبدالباري مدني وايي: « د رسول الله(ص) له احادیثو ښکاري چې سحر او جادو په اسلام کې مطلق حرام دي او د جمهورو علماوو په اند د دې عمل ترسره کوونکی د اسلام له دایرې وتلی او له ایمان خلاص دی. د دې مانا دا ده چې د چا په وجود کې یوه زره ایمان هم وي، د هغه کوډې او سحر اغېز نه کوي. دا کبیره ګناه ده، له شرک سره برابر او حرام کار دی. د وخت حکومتونه مکلف دي چې ساحران ونیسي، بندي یې کړي او سزا ورکړي.»
محصل خالد رحماني وايي: « د جامعې د ساتنې لپاره یوه غوره لاره دا ده چې له دې شومې پدیدې مخه ونیول شي.»
دا په داسې حال کې ده چې د اسلامي امارت له واک ته رسېدو وروسته امر بالمعروف، نهې عن المنکر او شکایتونو اورېدلو وزارت د کوډو او جادوګرۍ فعالیتونه په ټول هېواد کې منع کړي او په دې موده کې یې له زرو زیات کسان د دې عمل په تور نیولي هم دي.
