د هند بهرنیو چارو وزارت ځانګړي استازي او د افغانستان، ایران او پاکستان څانګې رییس انند پرکاش د افغانستان اسلامي امارت د بهرنیو چارو وزارت سرپرست مولوي امیرخان متقي سره کتلي.
متقي د دې کتنې پرمهال د دواړو هېوادونو ترمنځ د ډېپلوماټیکو او اقتصادي اړیکو پر پراختیا ټینګار کړی او څرګنده کړې یې ده چې په افغانستان کې اوسمهال د پانګونې لپاره ښه فرصتونه برابر شوي او هندي پانګوال هم ترې ګټه اخیستی شي.
د بهرنيو چارو وزارت مرستيا وياند ضيا احمد تکل وايي: « د بهرنیو چارو وزیر د دواړو هېوادونو تر منځ د ډېپلوماتیکو او اقتصادي اړیکو پر پراختیا ټینګار وکړ او څرګنده یې کړه چې افغانستان کې اوس مهال د پانګونې لپاره ښه فرصتونه برابر دي او هندي پانګوال دې له دغه فرصتونو په استفادې په افغانستان کې پانګونه وکړي.»
امیرخان متقي په دې لیدنه کې دا هم ويلي، د افغانستان او هند ترمنځ د خلکو تګ راتګ او د سوداګرو په شمول دې ناروغانو او محصلینو ته د ویزو په ورکړه کې اسانتیاوې رامنځته شي.
د بهرنیو چارو وزارت مرستیال ویاند په دې اړه وايي: « د بهرنیو چارو وزیر همدا راز وویل، د افغانستان او هند تر منځ د خلکو تګ راتګ په برخه کې باید اسانتیاوې رامنځته شي او د سوداګرو په شمول دې ناروغانو او محصلینو ته د ویزو ورکړه عادي حالت ته راوګرځول شي.»
د بهرنیو چارو وزارت له اعلامیې سره سم، د هند استازي په دې کتنه کې پر زيربنايي پروژو د خپل هېواد د پانګونې ډاډ ورکړی او زياته کړې يې ده چې هېواد یې غواړي د هغو پروژو کارونه بېرته پيل کړي چې له مودې راهیسې نيمګړې پاتې دي.
