د پکتیا اطلاعات او کلتور مشر خالقیار احمدزی وایې، ۲۰۳ تندر قول اردو او پکتیا امنیه قوماندانۍ ته د مخکیني حکومت یو شمیر اداري کارکوونکي را غوښتل شوي او یو شمېر سرتېرو سره هم اړیکې نیول شوي دي.
احمدزی وايي:« نظامي ادارو ته هم کسان راغوښتل شوي، د امنیه قوماندانۍ ټوله تخنیکي ډله پر دندو ګومارل شوې، پوځیانو پسې هڅې روانې دي او له ځینو سره یې اړیکې هم نیول شوي دی.»
د پکتیا امنیه قوماندانۍ د پېژند مدیر مولوي حبیب الله وایي، د مخکیني حکومت د پولیسو یو شمېر منسوبین بېرته راغوښتل شوي او دا مهال پر دندو بوخت دي.
حبیب الله زیاته کړه:« مفسد کسان نه وي، په فساد ککړ نه وي ، عقیدوي کسان وي،هغه را غوښتل شوي او له ماسره په اداره کې کار کوي.»
د پکتیا امر بالمعروف ادارې مشر مولوي جنت الله ابوبکر وايي، اسلامي امارت ملکي او امنیتي برخو کې ژمنو ځوانانو ته اړتیا لري او جذبولو ته به یې دوام ورکړي .
ابوبکر وايي:«هغه کسان چې دین او هېواد ته فادار وي،هغوی ته به موږ نظام کې ځای ورکوو. هغه خلک به دې نظام کې ولس ته خدمت کوي. دا د هر چا نظام دی او هر څوک په کې کار کولای شي.»
دا لومړی ځل دی، چې پکتیا کې د اسلامي امارت مسوولین امنیتي ادارو ته د مخکیني حکومت مامورین او سرتېري ورغواړي، خو ملکي ادارو ته بیا ټول مامورین له وړاندې ور غوښتل شوي دي.
