له ګاونډیو هېوادونو راستنو شویو کورنیو ماشومان او ځوانان په کابل کې راټول شوي، ترڅو د زده کړو دوام لپاره ازموینه ورکړي او له خپلې سویې سره سم د افغانستان پوهنیز سیسټم ته جذب شي.
د کابل پوهنې رییس وايي، د ازموینې په دې دوره کې به له ۶۰۰ زیاتو راستنو شویو افغان ماشومانو ازموینه واخیستل شي، ترڅو د افغانستان په ښوونځیو کې جذب شي.
د عبدالباسط حقاني په خبره، د مشرتابه له لارښوونو سره سم له بهرنیو هېوادونو ټولو را ستنو شویو افغانانو ته د زده کړو زمینه برابره کړي او دې موخې ته د رسېدو لپاره یې ځانګړی مکانېزم هم جوړ کړی چې پر بنسټ به یې په دې برخه کې چارې پرمخ ځي.
حقاني په دې اړه وايي: « له ۶۰۰ زیاتو ځوانانو نوملیکنه کړې وه چې نن یې له ډلې ۳۳۰ تنه ځوانان یوازې لسم او یوولسم ټولګیو ته د جذب لپاره ازموینه ورکوي.»
په همدې حال کې د پوهنې وزارت بیا ټولو هغو افغانانو ته چې له بهرنیو هېوادونو او په ځانګړې توګه له پاکستان او ایران بېرته هېواد ته راستنېږي، ډاډ ورکوي چې د ټولو پر وړاندې د هر ډول زده کړو دروازې پرانیستې دي.
د پوهنې وزارت د ښوونې او روزنې معین صحاالله سعید وايي: « ستاسو پرمخ د ټولو تعلیمي ادارو او بنسټونو دروازې خلاصې دي، که دا پوهنتونونه دي، که ښوونځي دي، که مدرسې یا هم د سواد زده کړې مرکزونه او دارالحفاظونه.»
په ورته مهال، د ازموینې لپاره راغلي کسان خوښ دي چې سرپرست حکومت ورته د زده کړو زمینه برابره کړې ده.
دوی وايي، غواړي خپلو پاتې زده کړو ته په خپل هېواد کې دوام ورکړي.
له پاکستان راستون شوی عصمت الله وايي: « د افغانستان له اسلامي امارت ډېر خوښ او منندوی یو چې موږ ته یې په خپل ګران هېواد کې د زده کړو زمینه برابره کړې.»
له ایران راستون شوی مطیع الله وايي: « ډېر خوښ یم چې دلته زمینه برابره شوې، ترڅو زده کړو ته ادامه ورکړو. په ایران کې د افغانانو لپاره شرایط مساعد نه و او اجازه یې نه لرله چې لوست وکړي.»
د کابل ولایت د پوهنې ریاست د مالوماتو له مخې، تېرکال د ۷ دورو ازموینو له لارې له ۳ زرو زیات بېرته راستانه شوي افغانان ښوونځیو ته جذب شوي او سږکال هم دغه لړۍ روانه ده.
دا په داسې حال کې ده چې په دې وروستیو کې پاکستان او ایران هېوادونو زرګونه افغان کډوال په جبري توګه ایستلي او دغه لړۍ لاهم په چټکۍ سره روانه ده.
که څه هم راستنې شوې کورنۍ د خپلو ماشومانو او ځوانانو زده کړو ته اندېښنه لري، خو د سرپرست حکومت چارواکي د دوی اولادونو ته د زده کړو د ادامې ډاډ ورکوي.
