د پاکستان تر کنټرول لاندې سيمو کې د ناامنيو له زياتېدو سره، د پاکستان او روسیې ګډې کاري ډلې له نړیوال تروریزم سره د مبارزې پر لارو چارو بحثونه کړي.
دغه بحثونه د سې شنبې په ورځ(د اپریل پر ۲۳ مه) شوي چې د پاکستان بهرنيو چارو وزارت په خبره، د افغانستان پر ځای سيمې ته د ترهګرۍ د فعاليت ساحې پر بدلېدو هم په کې تمرکز شوی.
د پاکستان د بهرنیو چارو وزارت د اعلاميې په خپرولو سره ویلي، دواړو خواوو له افغانستان او سيمې د متوجې ګواښونو مخنيوي او ګډو همکاريو په اړه هم ژور بحثونه کړي.
د اعلامیې یوه برخه: « دواړو خواوو د سیمه ییزې او نړيوالې ترهګرۍ او په ځانګړي ډول له افغانستان او سیمې د مخ پر زیاتېدونکي ترهګریز ګواښ په تړاو ژور بحثونه وکړل. دغه بحثونه تر ډېره د ترهګريزو فعاليتونو لپاره د سیمې بدلېدو او له دې پدېدې سره د مبارزې پر تطبیقي او د همکارۍ وړ سټراټیژیو د زیاتوالي پر اړتیا متمرکز وو.»
د اسلامي امارت سرپرست حکومت له افغانستانه بهر ته د تهديد په اړه هر ډول ادعاوې په ردولو سره وايي، اوس مهال په افغانستان کې امنيت تامين دی او هېڅ ورانکارې ډلې ته په خپله خاوره کې د فعاليت اجازه نه ورکوي.
د اسلامي امارت مرستیال ویاند حمدالله فطرت وايي: « په افغانستان کې له تېرو درې نیمو کالو راهیسې بې ساری امنیت تأمین شوی او د هېواد ټوله جغرافیه د اسلامي امارت د ځواکونو تر کنټرول لاندې ده. دفاعي ځواکونه د پولو امنیت ته پوره متوجه دي او هېچا ته د افغانستان له خاورې امنیتي تهدید نه دی متوجه، په دې اړه ټولنې اندېښنې بېځایه دي او موږ یې ردوو.»
د سیاسي چارو کارپوهان بيا برعکس د پاکستان تر کنټرول لاندې سيمو کې امنيتي وضعيت د ژورې اندېښنې وړ بولي او زیاتوي، دې وضعيت پاکستان له کاواکۍ سره مخ کړی.
د سیاسي چارو کارپوه ادریس محمدي ځاځی وايي: « د معلوماتو، ثبوتونو او شواهدو پر بنسټ باندې، تل دلته افغانستان کې د نورو هېوادونو سیاستونو، پالیسیو او ډلو ټپلو مشکلات جوړ کړي او هغه آلات یې د خپلې ګټې لپاره لوبولي دي.»
ځينې نور بيا دلته روانو ناامنيو ته د سيمې او افغانستان پر وړاندې د پاکستان له پالیسيو سره تړاو ورکوي او ټينګار کوي، که دا پاليسۍ واقعيتونو ته په کتو مثبت بدلون ونه کړي، ښايي ياده ناامني د پاکستان ترڅنګ په ټوله سيمه او افغانستان هم اغېز وکړي.
د پوځي چارو کارپوه توریالی ځاځی وايي: « په دې ټوله نړۍ ښه پوهېږي چې پاکستان د تروریستي ډلو ټپلو ځاله، یو جنایت کاره هېواد او جنایتکارانه سیاست لري.»
د روسي او پاکستاني چارواکو دغه خبرې داسې مهال دي چې د افغانستان لپاره د روسيې ځانګړی استازی ضمير کابلوف کابل ته راغلی او د بهرنيو چارو وزارت له سرپرست سره يې د دواړو هېوادونو ترمنځ د اړيکو پراخولو ته ژمنتيا ښودلې.
د بهرنیو چارو وزارت د اعلامیې په خپرولو سره وايي: « روسيه په مسکو کې د سفیر په کچه د اسلامي امارت ډېپلوماټ مني او د افغانستان حکومت به په نږدې راتلونکي کې مسکو لپاره د سفیر په توګه ډېپلوماټ معرفي کړي.»
په دې لیدنه کې ضمیر کابلوف زیاته کړې چې په راتلونکې مې میاشت کې به د کازان فورم په څنډه کې د روسیې او افغانستان د دوه اړخیز اړیکو دایمي کمیسیون د کار پيلولو لپاره ځانګړې غونډه هم وشي.
