پکتیا کې د چهار شنبې پر ورځ د «۱۴۰۰ کال د لړم پر ۱۱ مه» د اسلامي امارت چارواکو له یو شمېر مدني فعالانو سره ناسته کې دوی ته ډاډ ورکړ، چې پر مدني فعالیتونو هېڅ ډول بندیز نه شته دی.
د اطلاعاتو او کلتور مشر خالقیار احمدزی وايي، مدني فعالان دې د پخوا په څېر خپل فعالیتونه پیل کړي او د نورو چارو تر څنګ اجازه ورکول کېږي، چې پر نظام رغنده نیوکې وکړي او نیمګړتیاوې یې ور په ګوته کړي.
احمدزی وايي:« مدني فعالانو ته ډاډ ورکوو، چې د پخوا په څېر به ستاسو فعالیتونه روان وي. پر نظام او جوړښت یې رغنده نیوکې کولی شي، که هر څوک نیوکه کوي، امارت ورسره ستونزه نه لري.»
د پکتیا د امر بالعمروف ادارې مشر جنت الله ابوبکر اسلامي امارت د خلکو نظام بولي او له ځوانانو غواړي، چې خپل یې وګڼي او همکاري ورسره وکړي.
ابوبکر زیاته کړه:«داسې نظام راغلی، چې د هر چا حقونه به په کې خوندي وي، ځوانانو ته دغه روحیه او ډاډ ورکوو، چې دغه نظام یوازې د طالب نه دی، نظام دې خپل وګڼي او همکاري دې ورسره وکړي.»
مدني فعالان د اسلامي امارت له لوري د مدني فعالیتونو اجازه ورکول د خوښۍ خبر بولي او وایي، د پخوا په څېر به خپلو فعالیتونو ته دوام ورکړي.
مدني فعال رحمت الله عرفان وايي:« ځوانان کولی شي، خپل فعالیتونه وکړي او دلته راشي کار وکړي دا یو ښه زیری دی. ما ډېری داسې ځوانان لیدلي، چې زړونه یې مات شوي او فکر کوي، چې امارت د فعالیتونو اجازه نه ورکوي.»
