د ناروې کډوالو شورا (اېن.آر.سي) له افغانستان سره د نړيوالو بشري مرستو کموالي له امله په هېواد کې پر بشري وضعيت د ناوړه اغېزو په اړه اندېښنه ښودلې.
دې شورا په خپل تازه راپور کې د افغانستان اوسنی بشري کړکېچ د تېرو۲۲ کلونو په پرتله بې ساری بولي او زياتوي، د يادو مرستو د کموالي له امله د افغاني ټولنې ډېری زيانمنونکي اقشار چې پر ښځو او ماشومانو سربېره داخلي بې ځايه شوي هم په کې شامل دي، زيانمن شوي دي.
راپور کې له زيانمنونکو افغانانو سره د مرستو پر دوام د ټينګار ترڅنګ له ملګرو ملتونو غوښتل شوې چې له په بېړنۍ توګه د اړمنو افغانانو دوامداره ملاتړ وکړي.
د راپور یوه برخه:« لويو مرستندويانو په ډېرې چټکۍ له افغانستان سره مرستې کمې کړې چې دا د دې سبب شوی، ترڅو د ناروې کډوالو شورا او نور ملاتړي بنسټونه هم له زيانمنونکو افغانانو سره مرستې کمې کړې. د افغانستان په لوېديځ کې چې کوم خلک په لنډمهالو او غير پلاني سیمو کې اوسېږي، اوس د نړيوالو دا بې توجهي احساسولی شو.»
خو د اقتصاد وزارت د ناروې کډوالو شورا دا راپور له مبالغې خالي نه بولي او زياتوي چې افغانستان له اقتصادي پلوه پر خپلو داخلي عوايدو بسيا او د پرمختګ پر خوا روان دی.
د اقتصاد وزارت مسلکي معين عبداللطیف نظري وايي: « هغه راپورونه چې په دې وروستیو کې د افغانستان د اقتصادي وضعیت په تړاو د ځینو بهرنیو بنسټونو له خوا خپرېږي، مبالغه آمېزه دي. افغانستان له اقتصادي پلوه د پرمختګ په حال کې دی. که څه هم زموږ اتکا په داخلي سرچینو او عوایدو ده، خو په ورته وخت کې موږ له بهرنیو مرستو هم هرکلی کوو او غواړو چې د افغانستان له خلکو سره هم بشردوستانه او هم پراختیايي مرستې ادامه ولري او بندیزونه لرې شي.»
په همدې حال کې د بشري حقونو ځيني مدافعان هم د بشري کړکېچ مخنيوي لپاره د نړيوالو بشردوستانه مرستو دوام مهم بولي او د هېوادونو په شمول له نړيوالو سازمانونو غواړي چې له افغانستان سره مرستې دوامداره کړي.
د بشري حقونو مدافع گلاخان بهادري وايي: « افغانستان له بل هر وخت زیات بشري مرستو ته اړتیا لري، ترڅو د یوه بشري ناورین او بحران مخه ونیول شي. په داسې حال کې چې په دې وروستیو کې له پاکستان او ایران څخه ګڼ شمېر افغان کډوال هېواد ته راستانه شوي او له ډېرو ستونزو سره مخ دي، د ژوند لومړنیو توکو، کار او سرپناه ته اړتیا لري.»
د ناروې کډوالو شورا داسې مهال په افغانستان کې د نړيوالو مرستو کموالي له امله د بشري وضعيت سختوالي په اړه اندېښنه ښيي چې واک ته د سرپرست حکومت له رسېدو سره يادې مرستې محدودې شوې.
د امريکا ولسمشر په توګه د ډونالډ ټرمپ له ټاکل کېدو سره پرهغو خيريه بنسټونو بسپنې پرې شوې چې د امريکا له لوري تمويل کېدې.
