کابل ته د پاکستاني چارواکو د ګرمو سفرونو په لړ کې د اسلامي امارت سرپرست حکومت هم د صنعت او سوداګرۍ وزارت سرپرست نور الدین عزیزي پر مشرۍ د چهارشنبې په ورځ(د اپريل ۱۶ مه) له ۹ وزارتونو او ادارو تشکيل شوی پلاوی اسلام اباد ته ولېږه.
د صنعت او سوداګرۍ وزارت سرپرست نورالدین عزیزي وایي، د یاد هېواد د سوداګرۍ، کورنیو او بهرنیو چارو وزارتونو له چارواکو سره یې د سوداګرۍ په برخه کې د شته ستونزو، د سوداګرو د وېزو او د تورخم لارې د بیا ځلې نه تړل کېدو په تړاو خبرې کړي.
عزیزي زیاتوي: « په جبري توګه د افغان کډوالو داسې اخراج چې مالونه، شتمنۍ، دوکانونه او فابریکې یې په پاکستان کې پاتې کېږي، دا زموږ د ملت او کډوالو لپاره دردونکې خبره ده. د دوی وړاندیز دا و چې له پاکستان څ یو بل پلاوی راځي او په کابل کې به په ټولو مسایلو بحث کېږي.»
د افغانستان پلاوي له پاکستاني چارواکو غوښتي چې د کډوالو د بېرته را ستنېدو لړۍ منظمه کړي او هغه افغانان چې هلته د خپلې پانګونې له امله پاتې کېږي، بايد ستونزو ته يې جدي رسېدنه وشي.
نورالدین عزیزي په دې اړه وايي: « زموږ تجارتي او ټرانزیټي برخه واقعا ً متضرره ده او دا لړۍ له ډېرو کالونو راهیسې ادامه لري. په دې اړه مو د پاکستان د تجارت وزارت له چارواکو سره خبرې وکړې، د تجارت او ټرانزیټ په برخه کې مو ځینې لاسته راوړنې هم لرلې، دا چې تورخم او سپین بولدک دروازې باید د یوه مکانیزم له مخې ۲۴ ساعته خلاصې وي او هېڅکله بندې نه شي. همدارنګه زموږ د سوداګرو لپاره د وېزو په اړه هم خبرې وشوې.»
د اقتصادي چارو کارپوهان په دې باور دي چې پاکستان له افغانستان سره په سوداګرۍ، سیاست، ټولنیزو او نورو بېلابېلو دوه اړخیزو اړیکو کې د کړو ژمنو په عملي کولو کې پاتې راغلی او سرپرست حکومت ته په کار ده چې پر پاکستان د تکيې پر ځای د بديلونو په لټه کې شي.
د اقتصادي چارو کارپوه نورالله عزیز وايي: « که څه هم پاکستان ډېر کله د افغانستان په اړه په خپلو کړو ژمنو کې پاتې راغلی او هغه ژمنې یې نه دي عملي کړې چې د تجارت، ټرانزیټ، سیاست او نورو برخو کې یې کړې دي. خو افغانستان په اوسنیو شرایطو کې د خپلو اقتصادي، سیاسي او نورو ګټو د ساتلو پر بنا مجبور دی چې له پاکستان سره د خبرو لړۍ جاري وساتي.»
د اقتصادي چارو کارپوه محمد یونس ځدراڼ وايي: « باید بدیلې لارې هم له پامه ونه غورځول شي او توجه ورته وشي، ځکه پاکستان دا ډول ژمنې ډېرې کړې، خو عمل یې نه دی پرې کړی.»
د افغانستان او پاکستان چارواکو دغه خبرې داسې مهال دي چې له دې وړاندې د پاکستان له لوري د تورخم لار د ۲۶ ورځو لپاره وتړل شوه او په دې توګه سوداګرو ته میلیونونه ډالره زیان واوښت.
خو روانه مياشت بيا پاکستان په زرو له خپلې خاورې او خيبرپښتونخوا د افغانانو شړلو لړۍ پيل کړې چې د دواړو هېوادونو پر اړیکو یې هم اغېز کړی.
