د پاکستان لومړي وزیر مرستیال او په ورته وخت کې د دې هېواد بهرنیو چارو وزیر محمد اسحاق ډار د یوه لوړ پوړي پلاوي پر مشرۍ کابل ته د سفر پرمهال د اسلامي امارت د بهرنیو چارو وزارت له سرپرست مولوي امیرخان متقي ترڅنګ له رییس الوزرا او اداري مرستیال سره جلاجلا کتلي دي.
دغو لیدنو کې د بېلا بېلو موضوعاتو ترڅنګ د دواړو هېوادونو ترمنځ د سیاسي اړیکو پر پراختیا او کچې لوړولوهم خبرې شوې دي.
د بهرنیوچارو وزارت سرپرست مولوي امیرخان متقي وايي: « سیاسي موضوع وه، په دې اړه طرفونو اتفاق وکړ چې د ډېپلوماټیکو اړیکو سطحه به لوړوي او په سیاسي برخه کې به همکاري زیاتېږي او دغه راز به مثبت لوري ته د چارو د سمون هڅه کېږي.»
له دغو لیدنو وروسته مولوي امیرخان متقي او محمد اسحاق ډار یوې ګډې خبرې ناسته کې راښکارل شول او زیاته یې کړه چې دواړو لوریو د افغانستان او پاکستان ترمنځ د سوداګرۍ او ټرانزټ په برخه کې د اسانتیاوو پر رامنځته کولو هوکړه کړې او ژمنه شوې چې پاکستان لوری به پر افغان سوداګرو ټکسونه راکم کړي.
دوی دغه راز زیاته کړه چې د هغو افغان کډوالو د ستونزو پرحل یې هم خبرې کړې چې په خپله خوښه او باعزته توګه خپل هېواد ته راستنیږي.
متقي وايي: « په میلیونونو انسانان چې ډېر یې پخوا راغلي او ځینې اوس هم هلته پاتې دي، د هغوی د راتګ په باره کې، له هغوی سره د ښه سلوک په باره کې، د هغوی د آبرومندانه او تدریجي انتقال په باره کې تفصیلي خبرې وشوې. له دې سره، د کډوالو چې کوم جایدادونه او مالونه دي د انتقال په اړه یې تفصیلي خبرې وشوې.»
د پاکستان بهرنیوچارو وزیر محمد اسحاق ډار وايي: « موږ په ډېر درناوي او عزت هغه کسان چې بېرته راځي، رالېږو. زه دا منم چې دا زموږ دیني، ګاونډیتوب او ورور ګلوۍ فریضه ده چې موږ افغان کډوال په باعزته توګه را ولیږو او ټول افغان کډوال کولی شي چې خپل اموال له ځان سره راوړي.»
په ورته مهال، د پاکستان بهرنیو چارو وزیر دا هم وویل، نه پاکستان او نه هم افغانستان باید د دې اجازه ور کړي چې خاوره یې د یو بل پر وړاندې وکارول شي.
اسحاق ډار زیاته کړه: « نه موږ د افغانستان پر وړاندې د خپلې خاورې د کارولو اجازه ورکوو چې راشي په افغانستان کې ورنکاري وکړي او نه دې هم افغانستان دا اجازه چا ته ورکوي چې خاوره یې زموږ پر ضد استعمال شي. دواړه هېوادونه باید دا اجازه ورنه کړي چې خاوره یې د ترهګریزو فعالیتونو لپاره وکارول شي. دواړه هېوادونه باید هېڅ ډول وران کارو عناصرو ته د فعالیت اجازه ورنه کړي.»
په دې تړاو بیا د اسلامي امارت دریځ دا دی چې نه یوازې پاکستان بلکې د هېڅ هېواد پر وړاندې به یې خاوره ونه کارول شي او نه هم چاته اجازه ورکول کېږي چې له افغانستانه نورو ته ګواښ پېښ کړي.
په همدې حال کې امیرخان متقي وویل، که د کابل او اسلام اباد ترمنځ شوي تازه هوکړې او پریکړې عملي شي، په بېلا بېلو برخو کې د دواړو هېوادونو پر ګټه دي.
متقي زیاته کړې: « دا نن چې کوم مجلسونه وشول، که په رڼا کې یې عمل وشي او دواړه طرفه یې عملي کولو ته توجه وکړي، دا به د دواړو هېوادونو په اقتصاد کې، په سیاست کې، په اړیکو او هرڅه کې ډېره مرسته وکړي او ښه پایله به ولري. موږ په همدې هیله یو.»
د امیرخان متقي او محمد اسحاق ډار ترمنځ په دې ګډه خبري ناسته کې د دواړو هېوادونو چارواکو وویل، پر څلورو مشترکو سترو اقتصادي پروژو لکه ټاپي، ټاپ، افغان ټرانس او کاسا زر یې هم خبرې کړې او تر ډېره په کې پرمختګونه هم شوي دي.
