د روان ۲۰۲۵ زېږدیز کال د اپریل میاشتې له پيل راهیسې پاکستان د افغان کډوالو د جبري ستنولو دویم پړاو پیل کړی او له مختلفو لارو یې زرګونه کورنۍ په زور افغانستان ته ستنې کړې دي.
له بلوچستان او د پاکستان له نورو ځایونو د کندهار د سپین بولدک له لارې را اړول شویو کډوالو ته د دې ولایت په تخته پل ولسوالۍ کې د انځرګي په نوم لنډ مهالی پنډغالی جوړ شوی.
د یاد پنډغالي مسوولین وايي، د ۲۰۲۵ کال د اپریل مياشتي له لومړۍ نېټې د سپين بولدک له لاري ۱ زر ۵۴۹ کورنۍ او دغه راز د پاکستان له مختلفو زندانونو څ۵۵۰ تنه زندانيان هېواد ته راستانه شوي دي.
د دوی په خبره، راستنو شویو کډوالو ته له رسېدو سره سم د خوړو، درملو، اوسېدو ځای، څښاک پاکو اوبو له مرستو سربېره، نقدي مرستي، سرپناه او د کور د اړتیا وړ توکو او اصلي مېنو ته د ستنولو لپاره ټرانسپورټي اسانتیاوې برابرې شوې دي.
د کندهار په تخته پل ولسوالۍ کې د کډوالو لنډمهاله پنډغالي د ثبت مسوول محمد اسحاق ادرس وايي: « د اپریل له لومړۍ نېټې تر نن ماسپښين پورې، یو زر او ۵۴۹ کورنۍ راستنې شوې دي چې ۸ زره ۱۰۷ تنه غړي لري. همدارنګه ۵۵۰ تنه قیدي مهاجر هم راستانه شوي دي.»
د کندهار د کډوالو او بېرته راستنېدونکو چارو رییس ولي جان بادام وايي: « په دې ځای کې موږ د ثبت کمېټه لرو، بله د خدماتو کمېټه ده دوی ته ډوډۍ تیاروي، د ټرانسپورټ کمېټه لرو، مالي کمېټه لرو چې له راستنېدونکو سره مالي مرسته کوي او د سیمکارټونو د وېش ډله هم شته ده چې راستنو شویو ته سیمکارټونه وېشي.»
له پاکستان راستانه شوي کډوال د پاکستان امنیتي ځواکونو له ظلم او زیاتي شکایت کوي او وايي، د پاکستان امنیتي ځواکونو يې پر کورونو چاپې وهلې، قېمتي توکي او پیسې یې ترې اخیستي او زنداني کړي يې دي.
له پاکستان راستون شوی عصمت الله وايي: « ما په پاکستان کې ۴۰ کاله تېر کړل، خو آخر یې په کور چاپه را ووهله او له باډر یې را تېر کړم. له چا ښځې پاتې دي او له چا کور او د کور سامان پاتې دي، نیسې یې او را شړي یې.»
له پاکستان یو بل راستون شوی میوند وايي: « هلته حالات ښه نه و، موږ یې را وشړلو. دلته شکر دی حالات ښه دي او خدمت مو کېږي. د اسلامي امارت له حکومت غوښتنه کوو چې موږ ته ځمکه راکړي او د کور غم مو وخوري.»
عبدالنبي وايي: « زه له کراچۍ راغلی یم او ډېر په تکلیفونو راغلم. یوازې ښځې او ماشومان مو را واخیستل نور هرڅه رانه پاتې شول. زه دلته په داسې حال کې راغلی یم چې د موټر کرایه هم راسره نه شته ده.»
پاکستان د ۲۰۲۵ کال د اپریل پر لومړۍ نېټه له دې هېواده د افغانانو د جبري ايستلو بهیر پیل کړ چې دغه بهير پر نړيواله کچه له توندو نيوکو او غبرګونو سره مخ شو.
