داسې ښکاري چې له پاکستانه د افغان کډوالو د ايستلو پرېکړه پخپله په دې هېواد کې د سياسي ګوندونو له غبرګون سره مخ ده.
دا پرېکړه له نړيوالو غبرګونونو سربېره د پاکستان پخواني لومړي وزير او د تحريک انصاف ګوند بنسټګر عمران خان له مخالفت سره هم مخ شوې ده.
خان چې دامهال په زندان کې دی ويلي یې دي، د افغان کډوالو پر وړاندې د پاکستان اوسني حکومت پرېکړې عادلانه نه دي.
د خان په خبره، په ورته پرېکړو سره په پاکستان کې امنيتي مسايل د حل وړ نه دي او وړانديز يې کړی چې د يوې قانوني طرحې تر جوړولو پورې دې په جبر د افغان کډوالو د ایستلو لړۍ ودرول شي.
هغه زیاته کړې:« د پښتونخوا په اسمبلۍ کې باید د افغان کډوالو په اړه یو داسې پرېکړه لیک تصویب شي چې د افغان کډوالو ایستلو ته قانوني لاره جوړه شي او همدا راز دې د کډوالو ایستلو لړۍ وځنډول شي. موږ یوازې د کډوالو په ایستلو سره نه شو کولی چې د ترهګرۍ ستونزه حل کړو؛ ځکه د ستونزې حل لپاره اړتیا ده چې له افغان لوري سره په دې اړه پرله پسې خبرې وشي او دا څه د پښتونخوا فډرالي حکومت کولی شي.»
په ورته مهال، د پښتون ژغورنې غورځنګ مشر منظور احمد پښتين هم د کډوالو پر وړاندې د پاکستان دریځ ظالمانه بللی او هلته له مېشتو افغانانو یې غوښتي چې د دې پرېکړې پر وړاندې چوپه خوله پاتې نه شي او په دې اړه پیل شویو لاریونونو کې دې ګډون وکړي.
پښتين په دې اړه ویلي: « نن په چمن کې د مرکزي او ایالتي مشرانو او زرګونو ځوانانو د افغانانو د جبري او ظالمانه ایستلو پر ضد یو غټ احتجاجي لاریون دوام لري. دا یوه انساني مساله ده؛ د خاموشۍ وخت نه دی. له ټولو افغانانو غوښتنه کوو چې تر ممکنه حده په کې ګډون وکړي.»
بله خوا، د سیاسي چارو شنونکي د پښتين او عمران خان د دریځ ستاینه کوي او وايي، پاکستان په وار وار د افغانانو په ځورولو لاس پورې کړی او د دوی پر وړاندې يې له هېڅ ډول زور زياتي درېغ نه دی کړی.
د سیاسي چارو شنونکی اختر محمد راسخ وايي: « عمران خان د ظالمانو، جابرانو او انګلیسي غلامانو له آدرسه دا مهال خپله له یوه داسې سرنوشت سره مخامخ دی چې هلته ډیموکراسي، د انسانیت مقام، د اسلامیت رکن، د ګاونډیتوب قوانین هېڅ ارزښت نه لري. همدوی دي چې افغان کډوال یې له بدو ناخوالو سره مخامخ کړي دي.»
خو ځینې نور بیا وايي، د عمران خان د واکمنۍ په دوره کې هم افغان کډوال ځورول شوي، خو په خبره يې نوموړي يې دفاع نه ده کړې.
دوی له نړیوالو غواړي چې له کډوالو سره د پاکستان چلن پر وړاندې جدي غبرګون وښيي.
د سیاسي چارو شنونکی توریالی ځاځی وايي: « د عمران خان خبرې هسې د اوسپنو ټکول دي. عمران خان په خپلې واکمنۍ کې هم زموږ په هېواد کې د نړیوالو سیاسي اهداف پلي کړي، ده هم د افغانانو او افغانستان لپاره ښه کړنه نه ده کړې. له بلې خوا، ډېر د شرم او تأسف ځای دی چې ملګري ملتونه او نړیواله ټولنه او په ځانګړې توګه زموږ په هېواد کې د امریکا استازی خلیلزاد، چوپه خوله دي.»
د کډوالو او راستنېدونکو چارو وزارت د مالوماتو له مخې، د اپریل له لومړۍ نېټې تر دې مهاله شاوخوا ۲۵ زره افغان کډوال له خیبرپښتونخوا او پاکستانه پر زور او جبر را ایستل شوي دي.
دغه وزارت د را ایستل کېدونکو کډوالو لپاره د هر اړخیز چمتووالي ډاډ ورکړي.
