پاکستان کې هغه افغان کډوال چې بهرنیو هېوادونو ته د تګ په تمه دي، ډېری یې د کډوالۍ په اړه د ځينو هېوادونو د پالیسيو سختوالي له امله له نامالوم برخلیک سره مخ دي.
د امریکا د ولسمشر له لوري یاد هېواد ته د افغان کډوالو د تګ لړۍ ځنډول او په اروپایي هېوادونو کې په جرمونو د افغان کډوالو لاس پورې کولو په څېر مسایل هغه څه وو چې په درېیمو هېوادونو کې یې د پاتې افغان پناه غوښتونکو د کېسونو مخته تګ پروسې ستونزمنې کړې.
تازه د جرمني بېلډ ورځپاڼې ویلي، دغه هېواد باید له پاکستانه د ۲ زره او ۶۰۰ افغان وګړو د لېږد اقدام وکړي.
په راپور کې د جرمني د بهرنیو چارو وزيرې له قوله ویل شوي، جرمني د افغانانو پر وړاندې کړو ژمنو ته پابند دی.
د جرمني بهرنیو چارو وزیرې انالینا بایربوک ویلي: « پاکستان کې لاهم شاوخوا ۲ زره او ۶۰۰ کسان شته چې د جرمني له خوا د منلو رسمي ژمنه ورسره شوې ده.»
همدارنګه د جرمني کورنیو چارو وزیرې نانسي فېزر ویلي: « په دې مواردو کې موږ روښانه مکلفیتونه لرو. یانې لا هم ۱۶ نورې الوتکې باید افغان کډوال جرمني ته راولېږدوي.»
په پاکستان کې جرمني ته د تګ لپاره په تمه د يو شمېر افغانانو ناڅرګند برخلیک په اړه اندېښنې داسې مهال دي چې د کډوالو پر وړاندې د یاد هېواد دریځ لا سخت شوی دی.
د جرمني ځینې ګوندونه په دې هېواد کې د کډوالو له خوا شویو جرمونو ته په کتو د افغان کډوالو پر نه انتقالېدو ټینګار کوي او د خلکو د رایو او د نوي پارلمان د اکثریت غړو د ارادې مطابق د يادې پروسې بندېدل غواړي.
د جرمني د ښي اړخي محافظه کار ګوند د بهرني سیاست ویاند یورګن هارت ویلي: « نږدې څلور کاله وروسته له هغې چې نړیوال ماموریت مو پای ته رسېدلی، دا نه درک کېږي چې ولې لا هم خلک باید له افغانستانه و ایستل شي؟ سرپرست حکومت باید دا ډول اقدامات د خلکو د رایو او د نوي پارلمان د اکثریت له ارادې سره سمدستي بند کړي.»
په پاکستان کې د مظلوم ولسي تحریک ویاند نعمت الله خان وايي: « دلته پاکستان کې هغه کسان له ستونزو سره مخ دي چې د جرمني د پناه غوښتونکو پروګرام ته یې غوښتنلیکونه ورکړي. د جرمني په داخل کې هم ځینو سیاستوالو پر دې پروګرام نیوکې وکړې، نو په دې سره هلته هم ستونزې او دلته هم ستونزې پیدا شوي او منځ کې یې دا خلک راګیر شول.»
د راپورونو له مخې، د جرمني اوسني حکومت له لوري د داوطلبانه پروګرامونو پای ته رسول تر دې دمه ممکن نه ښکاري.
د جرمني چاپ بېلډ ورځپاڼې په خپل راپور زیاته کړې: « د تور- سور ايتلافي حکومت په تړون کې لیکل شوي چې دوی به د فډرال داوطلبانه منلو پروګرامونه تر ممکنه حده پای ته ورسوي، خو د اوسني حکومت له نظره دا کار تر اوسه ممکن نه ښکاري.»
د اسلامي امارت د کډوالو او راستنېدونکو چارو وزارت په دې تړاو خپل نظر له موږ سره شریک نه کړ، خو په پاکستان کې د کډوالو د حقونو یو شمېر مدافعان وایي، د افغان کډوالو کېسونه په جدي ډول نه څارل کېږي او بېرته افغانستان ته یې ستنېدل هم سخت دي.
د کډوالو د حقونو مدافع ظاهر بهاند وايي: « هغه افغانان چې د جمهوریت له سقوط وروسته د خپلو کېسونو مخته وړلو لپاره پاکستان ته کډوال شوي وو، اوس له سختو ستونزو او کړاوونو سره مخ دي. دا افغانان له نړیوالې ټولنې او هغو هېوادونو چې دوی ورسره کېسونه لري، غوښتنه دا ده چې ژر ترژه یې ستونزه حل کړي.»
دغه څرګندونې وروسته له هغه کېږي چې پاکستان تازه د افغان کډوالو د راشړلو لړۍ تېزه کړې او په اړه یې د نړیوالو سازمانونو ترڅنګ ګڼو هېوادونو هم اندېښنه څرګنده کړې او غوښتنه یې کړې چې د افغان کډوالو په ایستلو کې نړیوالو قوانینو ته پام وکړي.
