د افغانستان لپاره د اروپایي ټولنې ځانګړي استازي په توګه د توماس نیکلاسن ماموریت په رسمي توګه پای ته ورسېد.
توماس نیکلاسن وايي، د اروپايي ټولنې د ځانګړي استازي په توګه یې ماموریت د روان زېږدیز کال د مارچ میاشتې په لومړۍ نېټه پای ته رسېدلی.
هغه په ۲۰۲۱ کال د افغانستان لپاره د اروپايي ټولنې د ځانګړي استازي په توګه خپل ماموریت پېل کړ او د ماموریت له پیل دوې میاشتې وروسته یې د اسلامي امارت سرپرست حکومت په افغانستان کې حاکم شو.
نیکلاسن وايي: « زما د مامویت پای ته رسېدل به د افغانستان په اړه د اروپايي ټولنې په دریځ کې هېڅ بدلون را منځته نه کړي. اروپايي ټولنه به په افغانستان کې خپل حضور ته دوام ورکړي. دا د افغانستان له خلکو سره د ژمنتيا ښکارندويي کوي. د اروپايي ټولنې د ګټو او ارزښتونو د ساتنې ترڅنګ دا ټولنه له افغانستان او شریکانو سره یې د یو شمېر اصولو له مخې اړیکې ساتي.»
د نیکلاسن په خبره، دا مهال د افغانستان لپاره د اروپایي ټولنې د ځانګړې استازولۍ مسوولیت به د افغانستان او پاکستان لپاره د درين دريا په نوم د دې ټولنې یو ډېپلومات د لنډ وخت لپاره مخته یوسي.
نوموړی زياتوي، د ماموریت پای یې د افغانستان پر وړاندې د اروپایي ټولنې د سیاست بدلون په مانا نه دی او ارپايي ټولنه به په افغانستان کې خلکو ته د ژمنتيا او د دې ټولنې د ګټو او ارزښتونو د ساتنې په هدف خپل حضور ته دوام ورکړي.
د نړیوالو اړیکو شنونکی ابولحسن صالحي وايي:« په افغانستان کې د اروپايي ټولنې د ځانګړي استازي شتون او د فعالیتونو ادامه د ستاینې وړ ده؛ ځکه چې په یوه هېواد کې د نړیوالو څارونکو شتون ډېر اهمیت لري.»
د سیاسي چارو شنونکی نجیب الرحمن شمال وايي: « د افغانستان له خلکو د نړیوالې ټولنې او په ځانګړې توګه اروپايي ټولنې ملاتړ په داسې شرایطو کې چې د افغانستان خلک دغه ملاتړ ته سخته اړتیا لري، له ډېر اهمیت برخمن دی، ترڅو له اروپا سره د افغانستان اړیکې ورځ تر بلې لا پراخې شي.»
اروپايي ټولنې په تېرو څه باندې درېیو کلونو کې له افغانستان سره ۱.۶ میلیارد یورو په ارزښت بشري مرستې کړې او مسووليت يې په افغانستان کې اړمنو ته د بشري مرستو برابرول، د افغانستان او اروپایي ټولنې د سیاسي او سوداګریزو اړیکو د پراختیا لپاره کار کول دی.
اوس پوښتنه دا ده چې د افغانستان لپاره د اروپایي ټولنې ځانګړي استازي توماس نیکلاسن ماموریت د افغانستان لپاره څومره اغېزناک و؟
د نړیوالو اړیکو شنونکی مرتضی مطهري وايي: « په دې ډول شرایطو کې د نوموړي د ماموریت پای د افغانستان د خلکو لپاره مناسب نه دی، باید خپلې همکارۍ ته یې ادامه ورکړې وای.»
بله خوا، د اقتصاد وزارت د افغانستان لپاره د اروپایي ټولنې مرستې له افغانانو سره مهمې او اغېزناکې ګڼي او له اروپایي ټولنې غواړي چې له افغانستان سره په اوسنیو ناوړه اقتصادي شرايطو کې خپلې مرستې ډېرې کړي.
د اسلامي امارت مرستیال ویاند حمدالله فطرت وايي: « په افغانستان کې د نړیوالو ادارو او سیمه ییزو اتحادیو د استازو موجودیت هغه مهال بریالی او اغېزناک بللی شو چې د افغانستان د خلکو پر ګټه وي، د افغانستان او نړۍ د هېوادونو ترمنځ د اړیکو په جوړولو او پراختیا کې رول ولوبوي، شته ابهامات او ناسم تفاهم په له منځه وړلو کې اغېزناک ثابت شي.»
د اقتصاد وزارت مسلکي معین عبداللطیف نظري وايي: « زموږ غوښتنه دا ده چې اروپايي ټولنه د افغانستان له خلکو سره د بشردوستانه او انکشافي مرستو په برخه کې لا فعال او جدي رول ولوبوي.»
د افغانستان لپاره د اروپایي ټولنې مخکېني ځانګړي استازي توماس نیکلاسن دوې میاشتې وړاندې په یوه خبرې کنفرانس کې ویلي و چې د اروپایي ټولنې د تعامل او د افغانانو ملاتړ لپاره اړتیا ده چې د افغانستان سرپرست حکومت ځینو مسایلو ته په بېړه رسېدنه وکړي.
