د کندهار- سپین بولدک لاره سر له ننه د هر ډول تګ راتګ لپاره پرانستل کېږي

د کندهار او ننګرهار ولایتونو مسوولین په سپین بولدک او تورخم کې مسافرینو ته د اسانتیاوو برابرولو خبر ورکړی.

د کندهار- سپين بولدک کميسارۍ مرستيال مولوي همايون همت وايي، د سپين بولدک دروازه له پاکستان سره تر هوکړې وروسته سر له ننه د سهار له اتو بجو پرانيستل کېږي او د اتو ساعتونو لپاره به هره ورځ پرانيستې وي.

همایون همت وایي، له دې وروسته د سپين بولدک پر لاره سوداګریز موټر او عام خلک په عادي ډول تګ راتګ کولای شي او مسافر د کندهار پر تذکره او پاسپورت کولای شي سفر وکړي.

په ورته مهال د ننګرهار مسوولینو خبر ورکړی، چې تورخم ښارګوټي کې یې مسافرينو ته د شپې تېرولو ځای جوړ کړی.

د ننګرهار ولايت مقام ویلي، تورخم ښارګوټي کې یې د مسافرو لپاره شل بابه خېمې درولي دي.

مسوولینو ویلي، چې په دې خېمو کې یې د  کمپلو، بسترو، اوبو او نور اړين سهولتونه برابر کړي دي.

طالبانو څه موده وړاندې له افغانانو سره د پاکستاني ملېشو د ناسم چلند له امله د سپين بولدک دروازه تړلې وه، چې له امله يې سوداګرو ته درانه مالي زیانونه اوښتي وو .