په پاکستان کې وروستي وسله وال بریدونه او په افغان خاوره کې د دې بریدونو د ترسره کوونکو د شتون په تړاو د اسلاماباد ادعاوې هغه څه دي چې دې هېواد په تېرو نږدې څلورو کلونو کې ترې د اصلي اندېښنو په توګه یادونه کړې.
د پاکستان بهرنیو چارو وزارت ویاند شفقت علي خان ویلي، که څه هم له افغانستان سره ګډې تاریخي، کلتوري او ژبنۍ اړیکې لري؛ خو په وینا یې یو شمېر مسایل او اندېښنې د دې اړیکو د پراخوالي مخه نیولې.
علي خان امنیتي مسایل او د ډيورند فرضي کرښې دا غاړه د پاکستان ضد وسله والو شتون د پاکستان او افغانستان ترمنځ د اړیکو ترمخ لوی خنډ بللی.
هغه زیاته کړې:« موږ دوه هغه ګاونډیان یو چې ګډو تاریخي، کلتوري او ژبنيو اړیکو سره تړلي یو. موږ هڅه کړې چې له افغانستان سره اړیکې پراخې کړو؛ خو په دې لار کې اصلي ننګونه، امنیتي مسایل او د وسله والو له لوري هلته له خوندي پټنځایونو ګټه اخیستنه ده.»
علي خان یو ځل بیا ادعا کړې چې کواګې له امریکا پاتې وسلې د پاکستان ضد وسله والو لاس ته لوېدلي چې په وینا یې د دې هېواد د ځواکونو په نښه کولو کې ترې کار اخیستل کیږي.
علي خان ويلي، په دې اړه یې خپله اندېښنه پخوا هم له سرپرست حکومت سره شریکه کړې او له دې درکه د ناوړه پایلو په تړاو یې په ځلونو ټینګار کړی.
هغه څرګنده کړې:« اصلي مساله دا ده چې په افغانستان کې پاتې شوې امریکايي وسلې دننه په پاکستان کې زموږ د امنیتي ځواکونو پر وړاندې په وسلهوالو بریدونو کې کارول کیږي، دا هغه څه دي چې له دې وړاندې مو په ځلونو پرې ټینګار کړی. موږ تېر کې هم د دې پوځي تجهیزاتو د زیان رسوونکو او ناوړه پایلو په تړاو تاکید کړی.»
اسلامي امارت تر اوسه پورې په دې اړه غبرګون نه دی ښودلی، خو له دې وړاندې یې د پاکستان ضد وسلهوالو ډلو له لوري د افغان خاورې کارېدنې ادعاوې رد کړي او دغه څه یې پروپاګند بللي.
د سیاسي چارو شنونکي په دې هېواد کې امنیتي مسایل او د وسلهوالو ډلو فعالیت د دې هېواد کورنۍ موضوعات بللي چې په خبره یې افغانستان ته یې تړاو ورکول بې ځایه ادعاوې دي.
د سیاسي چارو شنونکی اختر محمد راسخ :« غواړي دغه وسلې چې په افغانستان کې پاتې دي، په کوم بهانو دغه ترلاسه کړې. دا ټوله بدبختي د پاکستان له ادرسه افغانانو ته جوړه ده. زموږ جغرافیه او سیاسیون د تروریستانو په نوملړ کې شاملول، یا دغه جغرافیه د تروریزم ښه بستر باندې معرفي کول دا د دوی( پاکستان) کړنې دي.»
دا په داسې مهال ده چې د امریکا او پاکستان بهرنیو چارو وزیرانو تېره سه شنبه له یو بل سره په ټیلیفوني خبرو کې په افغانستان کې د پاتي امریکايي پوځي تجهیزاتو بېرته ترلاسه کول اړین بللي و.
دې هېواد له دې وړاندې هم څو څوځله دغه وسلې د پاکستان امنیت لپاره ستر ګواښ بللي او د بېرته ترلاسي لپاره یې د امریکا د ولسمشر ډونالډ ټرمپ له څرګندونو یې هرکلی کړی دی.
