پاکستان د اپريل له لومړۍ نيټې راهیسې د افغان کډوالو د جبري ایستلو په اړه نوي تګلاره عملي کوي.
په خواله رسنیو کې یو شمېر ویډیوګانې خپرې شوې چې په کې پاکستاني پولیس افغان کډوال تر نېونې وروسته سخت شنکنجه کوي.
که څه هم د پاکستان دغه چلن په کور دننه او بهر غندل شوی، خو له دې سربېره بیا هم د دغه هېواد چارواکي خپله کړنلاره قانوني بولي.
تازه د پاکستان بهرنیو چارو وزارت وياند شفقت علي خان د افغان کډوالو ایستل د دغه هېواد د قانون او د نړیوالو مکلفیتونو سره سم عمل بللی دی.
هغه زیاته کړې:« پاکستان تل د خپلو افغان دوستانو، وروڼو او خویندو ترڅنګ ولاړ دی، له تېرو څلورو لسیزو راهیسې یې په سخاوت سره کوربتوب کړی. د غیرقانوني بهرنیانو د بېرته ستنولو پلان د پاکستان د نړیوالو مکلفیتونو او د کورني قانون سره سمون لري. دا د نړۍ یوه پېژندل شوې عملیه ده چې یوازې پاکستان پورې محدوده نه ده.غیرقانوني بهرنیانو د بېرته ستنولو پروګرام نه تصادفي دی او نه هم د تعصب پر بنسټ ولاړ دی.»
د پاکستان بهرنیو چارو وزارت ویاند په خپلو خبرو کې د افغان کډوالو ایستلو بهیر کې پر منظمې او عزتمندې پروسې ټنیګار کړی او په خبره یې د پاکستان حکومت هڅه کوي چې دغه بهیر د نړیوالو بشري حقونو او بشري اصولو سره برابره ترسره شي.
علي خان زیاتوي:« د پاکستان حکومت دا پلان په مرحله وار او سیسټماټیک ډول پلی کوي، هڅه کوو چې دا پروسه مؤثره، منظمه او له عزت سره ترسره شي.»
خو نړیوال سازمانونه او د سیاسي چارو کارپوهان د اسلام اباد دغه پالیسي د انساني موازيني خلاف ګڼي او د درېدو غوښتنه يې کوي.
د سیاسي چارو شنونکی ابوالحسن صالحي وايي:« پاکستان باید د نړیوالو قوانینو او ژمنو درناوی وکړي او له افغان کډوالو سره د نړیوال قانون په چوکاټ او د ملګرو ملتونو سترې کمېشنرۍ اصولو سره سم چلن وکړي ترڅو افغان کډوال په جبري بڼه ونه ایستل شي او تحقیر نه شي.»
د کډوالۍ سترې کمیشنرۍ د مالوماتو له مخې، پاکستان د اپريل له لومړۍ نېټې راهیسې تر اوسه څه باندې ۱۰ زره افغان کډوال په جبري ډول له دې هېواد ایستلي او لاهم دغه لړۍ په چټکۍ سره روانه ده.
