د اسلامي امارت مسوولین وايي، د رییس الوزرا اداري مرستیال مولوي عبدالسلام حنفي پر مشرۍ د کډوالو ستونزو ته د رسېدنې عالي کمیسيون او اړوند کمېټو له ګاونډیو هېوادونو د را ایستل کېدونکو افغان کډوالو د ستونزو حل په موخه ځانګړې ناسته کړې.
د اسلامي امارت مرستیال ویاند حمد الله فطرت وايي، په دې ناسته کې حنفي د یاد کمیسيون اړوند کمېټو ته سپارښتنه کړې چې د راستنو شویو افغان کډوالو لپاره لازمې اسانتیاوې برابرې کړي.
فطرت په دې اړه وايي: « د کډوالو ستونزو ته د رسېدنې عالي کمیسيون د دولس ګونو کمېټو ریيسانو غونډه وکړه. د کډوالو ستونزو ته د رسېدنې عالي کمېسیون د دولس ګونو کمېټو د ریيسانو غونډه د افغانستان اسلامي امارت د ریاست الوزراء اداري مرستیال محترم مولوي عبدالسلام حنفي پرمشرۍ د دغو کمېټو د ریيسانو او د یاد کمېسیون د ځينې اعضاوو په ګډون ترسره شوه. دا غونډه د هغو کډوالو د ستونزو د حل په موخه چې په اجباري توګه له ګاونډیو هېوادونو څخه را ايستل کېږي، جوړه شوې وه. د يادې موضوع له هر اړخيزې ارزونې وروسته مؤظفو کمېټو ته دنده وسپارل شوه چې د خپلو کاري استقامتونو په چوکاټ کې راستنېدونکو کډوالو ته د غوره خدماتو برابرولو هڅې او لازم اقدمات وکړي او د هغوی د ستونزو حل ته جدي پاملرنه وکړي.»
په ورته مهال د کډوالو او راستنېدونکو چارو وزارت سرپرست مولوي عبدالکبیر د سره صلیب، سرې میاشتې او د کډوالو نړیوال سازمان له مسوولینو سره په کتنو کې د افغان کډوالو پر ستونزو او حل لارو خبرې کړې دي.
یاد وزارت پر خپله اېکس پاڼه د یادو بنسټونو د مسوولینو له قوله ويلي، دغه بنسټونه د افغان کډوالو لپاره د خوړو او روغتیايي مرستو په برخه کې خپلو همکاریو ته ادامه ورکوي.
یاد وزارت زیاته کړې: « د افغانستان پولو کې اړوند ادارو له راستنېدونکو سره د روغتیا، خوراکي توکو، څښاک اوبو، خېمو او نور برخو کې مرستې کړې او د اغېزناکې همکارۍ لپاره له حکومتي ادارو سره په اړیکه کې دي.»
له پاکستانه په جبري توګه د افغان کډوالو د راستنولو دویمې څپې له پیل کېدو وروسته، یو شمېر پاکستاني رسنیو راپور ورکړی چې د روانې وري میاشتې له ۱۵ تر ۱۹ نېټي پورې شاوخوا ۱۱زره ۳۷۱ افغانان په جبر او خپله خوښه ایستل شوي دي.
هلته مېشت افغان کډوال وايي، د پاکستان حکومت د افغان تابعیت (اې.سي.سي) کارت لرونکو افغان کډوالو د ایستلو جبري لړۍ په شدت سره جاري ساتلې او هېڅ افغان کډوال ته اضافي مهلت نه ورکول کېږي.
د دوی په خبره، په خیبرپښتونخوا او پاکستان کې د څه باندې ۸۰۰ زره اې.سي.سي کارت لرونکي افغانان ژوند کوي.
په پاکستان کې دېره افغان ملک مجاهد شينواری وايي: « لکه څرنګه چې تاسو ته مالومه ده چې د پاکستان حکومت هغو افغان مهاجرینو ته چې د اې.سي.سي کارټونه لري او شمېر یې شاوخوا ۸۵۰ زرو تنو رسېږي او د پاکستان په مختلفو صوبو او ولایتونو کې ژوند کوي، له پاکستان څحه د وتلو حکم صادر کړی. نو په کراچۍ، لاهور، اسلام اباد او راولپنډۍ کې د افغان کډوالو د ایستلو لړۍ هماغسې روانه ده او د پاکستان حکومت په دې اړه نوي څه نه دي ویلي.»
دا په داسې حال کې ده چې د پاکستان حکومت د راجسټر شویو افغانانو (پي.او.آر) کارت لرونکو افغان کډوالو ته د روان زېږدیز کال د جون تر ۳۰مې مهلت ورکړی او له هغې وروسته یې د هغوی پر جبري ایستلو هم ټینګار کړی دی.
