وروسته له هغې چې د خوړو نړيوال پروګرام(ډبلیو.اېف.پي) د افغانستان په ګډون له يو شمېر هېوادونو سره د يادې ادارې له لارې د امريکا د مرستو بندېدو په اړه اندېښنه وښوده، يوه ورځ وروسته د امريکا حکومت تایيد کړه چې د ملګرو ملتونو د خوړو نړيوال پروګرام له لارې يې له افغانستان سره مرستې ځنډولې دي.
د امريکا بهرنيو چارو وزارت وايي، د مرستو لپاره د بسپنې ځنډولو پرېکړه له دې امله شوې چې د نورو هېوادونو لومړيتوبونو په پام کې نيولو ترڅنګ، د خوړو نړيوال پروګرام له لارې له عامو افغانانو سره د کېدونکو مرستو په بهير کې د افغانستان سرپرست حکومت لاسوهنه کړې.
د دې وزارت وياندې ټیمي بروس ادعا کړې چې د امريکا د يادو مرستو له درکه شاوخوا ۱۱ میلیونه ډالر د افغانستان سرپرست حکومت لاس ته ورغلي دي.
بروس زیاته کړې:« د خپل هېواد د لومړیتوبونو پر بنسټ مو د خوړو نړیوال پروګرام سره ډېرې کمې مرستې بندې کړې دي. په افغانستان او یمن کې له دې پروګرام سره د مرستو بندول د ترهګرۍ د اندېښنو له امله دي چې حوثیانو او طالبانو ترې ګټه اخیسته او دغه اقدام د ملګرو ملتونو په همکارۍ د مستند شویو پېښو او څېړنو له مخې شوی. د یمن په شمال کې حوثیانو د امریکا نړيوالې پراختیايي ادارې له لوري په کېدونکو مرستو کې مداخله کوله او موږ دغه مرستې بندې کړې او په ټول افغانستان کې مو هم د طالبانو د مداخلو کمولو لپاره د خوړو نړیوال پرواګرام سره مرستې ځنډولې دي.»
سرپرست حکومت د امریکا دا ادعا ردوي چې ګني د مرستو په بهير کې دې يې لاسوهنه کړې وي او په خبره يې، حکومت د مرستندويانو د امنيت ساتنې ترڅنګ دوی ته يوازې د مرستو وېشلو لپاره لازمې اسانتياوې برابروي.
د اقتصاد وزارت مسلکي معین عبداللطیف نظري وايي: « اسلامي امارت په نړیوالو مرستو او به ځانګړې توګه بشري مرستو کې هېڅ ډول مداخله او تصرف نه لري. موږ په دې اړه هر ډول راپورونه په کلکه ردوو. اسلامي امارت هڅه کوي چې د افغانستان له خلکو سره د نړیوالو مرستو لپاره تسهیلات برابر کړي.»
بله خوا د اقتصادي چارو شنونکي وايي، د امریکا له لوري د مرستو بندېدل به د اړمنو افغانانو پر وضعیت ناوړه اغېز وکړي او زياتوي چې هېوادونه دې له افغانانو سره خپلې مرستې له سیاست سره نه غوټه کوي.
د اقتصادي چارو شنونکی عبدالجبار ساپی وايي: « که چېرې د خوړو نړیوال سازمان هم خپلې مرستې پر افغانستان بندې کړي، ښکاره خبره ده چې خلک به له ستونزې سره مخ شي، خو اسلامي امارت او خصوصي سکټور په ګډه کار کوي چې خلکو ته د کار زمینه برابره کړي.»
د سیاسي چارو شنونکی سلیم پیګیر وايي: « په داسې وخت کې چې د امریکا په څېر ستر هېوادونه د افغانستان له خلکو سره خپلې مرستې بندوي، دا د افغانستان د خلکو سره یوه بله جفا ګڼل کېږي.»
دا په داسې حال کې ده چې د سې شنبې پر ورځ د امريکا ولسمشر ډونالډ ټرمپ ویلي، پر افغانستان او یمن به پاتې مرستې هم بندې کړي.
ډېری دغه مرستې د خوړو نړیوال پروګرام له لارې عامو افغانانو ته رسول کېدې، خو په بندېدو سره یې د لوږې زياتېدو په اړه د دې بنسټ اندېښنې هم راپورته کړې دي.
