له پاکستانه تازه راستانه شوي افغان کډوال وايي، له پولې پورې غاړه يې روان کاروبارونه او ډک کورونه پاتې دي.
د دوی په خبره، پاکستاني پولیسو د سر ایستلو اجازه ورکړې او د ډېرو فشارونو له امله د کور مهم وسایل هم ترې پاتې شوي دي.
له پاکستانه په جبر را ایستل شوی یو تن افغان کډوال وايي: « د پاکستان حکومت شپه او ورځ په افغان مهاجرو پسې ګرځي، د شپې یې په کورونو چاپې وهي او د اختر له درېیمې راهیسې یې نیول او افغانستان ته اړول پیل کړي دي. موږ له پاکستانه ډېر ګیله من یو، خو له اسلامي امارت خوښ یو چې موږ ته یې عزت راکړ.»
له پاکستانه یو بل تازه راستون شوی افغان کډوال بیا وايي: « دلته له موږ سره په هره برخه کې مرسته وشوه، هم خوراکي مرستې راکړل شوې او هم د اوسېدلو لپاره خېمې او کمپلې. موږ له دغو مرستو مننه کوو.»
دوی له سرپرست حکومت د سرپناه، کاري فرصتونو او بیا مېشتېدنې په برخه کې د همکاریو غوښتنه کوي.
له پاکستانه په جبر را ایستل شوی یو تن افغان کډوال وايي: « له اسلامي امارت غوښتنه کوو چې زموږ ماشومانو ته د ښوونځیو او زده کړو زمینه برابره کړي. دغه راز موږ ته د کاروبار غم وخوري، ترڅو وطن کې خپل کاروبار ولرو.»
تورخم کې ځايي مسوولین او اړوندې ادارې ډاډ ورکوي چې د راستنېدونکو کډوالو ستونزو او غوښتنو ته يې پام دی او په همدې موخه هڅې ورځ تر بلې ګړندۍ کېږي.
د ننګرهار کډوالو چارو رییس باز محمد عبد الرحمن وايي: « موږ دغو کورنیو ته په مختلفو ولسوالیو لکه حصارک، سپین غر او کامې کې سرپناوې جوړې کړې دي. همدارنګه موږ د حرفوي زده کړو زمینه هم برابره کړې.»
په ننګرهار کې د دولتي ادارو د مالوماتو له مخې، اوس مهال له راستنو شویو کډوالو سره د خپلو کورنیو د ملاتړ په موخه د حکومت او مرستندویه موسسو له خوا پر نغدي مرستو سربېره، د دوی لپاره د حرفوي زده کړو زمینه هم برابره شوې ده.
