د ایران بهرنیو چارو وزیر سید عباس عراقچي د افغانستان لپاره د دې هېواد له سفیر عليرضا بېکدلي سره په لیدنه کې له افغانستان سره په نږدې اړیکو لرلو ټینګار کړی.
عراقچي دغه راز ټینګار کړی چې باید هېواد یې له افغانستان سره په بېلابېلو برخو کې نږدې او مشترکه همکاري ولري او د دواړو هېوادونو ترمنځ شوې هغه هوکړې تعقیب شي چې د افغان کډوالو د بېرته ستنېدو په اړه شوې دي.
عراقچي زیاته کړې: « ایران او افغانستان دوه ګاونډي هېوادونو دي او باید نږدې او نیکې اړیکې ولري. دواړه لوري باید په بېلابېلو برخو کې ګډه همکاري ولري. هغه هوکړې باید تعقیب شي چې د افغان کډوالو د بېرته ستنېدو په اړه شوې دي.»
په ورته مهال، د اسلامي امارت د بهرنیو چارو وزارت سرپرست مولوي امیرخان متقي وايي، د افغانستان حکومت د خپل متوازن سیاست پربنسټ د ګاوڼدیو او سیمې هېوادونو په شمول، له ټولې نړۍ سره ښې اړیکې غواړي.
د متقي په خبره، اسلامي امارت د خپل غوره بهرني سیاست پر مټ بریالی شوی چې بېلا بېلو هېوادونو کې له ۴۰ زیاتې سیاسي استازولۍ ولري.
هغه زیاته کړې: « د سلامي امارت همدا متوازن سیاست چې د سیمې له هېوادونو سره هم ښې اړیکې غواړو، له ګاونډیانو سره هم ښې اړیکې غواړو، له نړیوالو سره هم ښې اړیکې غواړو، لامل شوی چې د نړۍ په لر او بر کې تر ۴۰ زیات سفارتونه او کونسګرۍ له موږ سره کار کوي او له هېوادونو سره مو راشه درشه ورځ تر بلې ډېرېږي.»
د سیاسي چارو کارپوهان بیا وايي، له نورو هېوادونو سره د افغانستان اړیکو ټینګښت نه یوازې دا چې په سیاسي او اقتصادي برخو کې د افغانانو پر ګټه دي، بلکې د نورو هېوادونو پر ګټه هم دي.
د دوی په خبره، باثباته او پرمختللی افغانستان د ټولو پر ګټه دی او اوس هېوادونو ته په کار ده چې له کابل سره تعامل ولري.
د سیاسي چارو شنونکی توریالی ځاځی وايي:« له ګاونډیو او سیمه ییزو هېوادونو سره د اړیکو ټینګول ځان ته نه بلکې له ټولې نړۍ سره د اړیکو ټینګول د افغانستان لپاره هم په سیاسي او هم په اقتتصادي لحاظ ډېر ارزښت لري.»
سره له دې چې د اسلامي امارت سرپرست حکومت پر رسمیت نه دی پېژندل شوی، خو کابل له ګڼ شمېر هېوادونو سره تعامل لري.
د روسیې، چین او قطر یو شمېر هېوادونه او نړیوال سازمانونه په کابل کې سفیران لري او د افغانستان حکومت هم د سیمې او نړۍ په زیات شمېر هېوادونو کې لسګونه فعال سفارتونه او کونسلګرۍ لري.
